O grupo Ribera Salud faise co control do Hospital Polusa, en Lugo, despois de que a Comisión Nacional dos Mercados e a Competencia (CNMC) autorizara en primeira fase a operación de compra e xestión en exclusiva.
Ribera Salud, cuxo accionista maioritario é o grupo estadounidense Centene Corporation, entrou por primeira vez na sanidade galega en 2019 ao facerse con máis do 90% das accións do hospital Povisa, en Vigo. Tamén é concesionario de centros de saúde pública en Valencia e Madrid.
Segundo a CNMC, “non é previsible” que esta operación de compra “vaia supor un obstáculo á competencia efectiva nos mercados de asistencia sanitaria a pacientes públicos e privados, nin no de cesión ou aluguer de espazos sanitarios”. Asegura que “as partes prestan os seus servizos en distintas provincias, sendo a cota conxunta en Galicia inferior ao 35%, cunha adición de cota inferior ao 5%”.
Ademais, o órgano de Competencia apunta que existen competidores alternativos, tanto a nivel autonómico (Grupo HM Hospitais, Grupo Quirón, VITHAS, e outros hospitais privados), como a nivel provincial (Hospital Nosa Señora dos Ollos Grandes).
O pasado mes de xullo o grupo sanitario Ribera Salud xa informara dun acordo cun grupo maioritario de accionistas do Hospital Polusa. Os asesores que participaron nesta operación foron Deloitte (asesor financeiro) e Cuatrecasas (asesor legal).
