O persoal do Concello de Lugo regresará, a partir do luns, ao teletraballo. A edil de Gobernación, Paula Alvarellos, asinou este xoves un decreto regulando a prestación de servizos baixo esta modalidade para que os empregados públicos poidan exercer as súas funcións desde os seus domicilios particulares, protexendo a súa saúde á vez que se garante o normal funcionamento da administración local en todos os seus ámbitos de actuación.
Segundo informou o Concello, a decisión do equipo de goberno chega despois de que se rexistraran varios casos positivos de covid en diferentes dependencias municipais.
“Tras a detección destes contaxios e, tendo en conta a evolución que está a seguir a pandemia na cidade, pareceunos oportuno e mesmo aconsellable implantar de novo o sistema de teletrabajo co fin de compatibilizar a seguridade do persoal coa actividade prestacional á cidadanía“, dixo a edil.
Así, só continuarán no seu posto os efectivos daquelas áreas que teñen que desenvolver un labor eminentemente presencial como pode ser o caso de Benestar Social, Fogar do Transeúnte, Rexistro, Cemiterio, Policía Local ou Bombeiros.
