Unha nova senda en Lugo na saída cara a Portomarín, entre o empalme coa antiga estrada a Santiago e Toiriz, no acceso á igrexa de Piugos, permitirá o desprazamento seguro dos peóns. Situada na estrada LU-621, esta senda xa está ao servizo dos veciños, segundo destacou a conselleira de Infraestruturas, Ethel Vázquez, durante unha visita este venres.
Vázquez reivindicou o incremento de seguridade na contorna desta vía, con máis de 3.000 vehículos ao día e con vivendas ás marxes. Ademais, destacou a colocación de dúas marquesiñas nas paradas de autobús para ofrecer protección fronte ás inclemencias meteorolóxicas.
A intervención nesta zona, que supuxo un desembolso de case 523.000 euros, segundo sinala a consellería, tamén contemplou o acondicionamento dunha fonte de auga, que se integrou nunha estrutura en forma de monólito dotada de escaleiras.
O itinerario forma parte do plan de senllas da comarca de Lugo, que recolle a execución de seis senllas cun investimento da Xunta de case 3 millóns.
