“Dende o SLG, reclamamos que a alcaldesa, como máxima representante do consistorio, asuma responsabilidades e destine unha partida económica a cargo das arcas municipais para cubrir as perdas ocasionadas“. É a petición que fai o Sindicato Labrego Galego ao Concello de Guitiriz por “omisión de socorro” por parte dos servizos de emerxencia de Guitiriz cando foron alertados de que se producira un incendio nun tractor en Labrada.

A alcaldesa, despois do sucedido, fixo declaracións a diferentes medios onde desmentía a versión dos feitos e afirmou que o persoal municipal do Plan de Prevención e Defensa contra Incendios Forestais de Galicia en Guitiriz non foi avisado. A alcaldesa rematou culpando de “falta de coordinación” aos servizos de emerxencias e cualificando de “moi graves” as acusacións do SLG.

Un informe de Axencia Galega de Emerxencias, dependente da Vicepresidencia da Xunta, demostra que unha vez constatado que os bombeiros de Vilalba quedaban demasiado lonxe e que os seus vehículos non eran os idóneos para acceder ao lugar do suceso, ao tentar contactar coas autoridades locais dende o Centro Integrado de Atención ás Emerxencias 112, deron aviso á Agrupación de Protección Civil de Guitiriz e se toparon co contestador automático da Policía Local. Ao pouco, recibiron a contestación de Protección Civil para informarlles de que “non hai persoal do Concello para saír ao incendio”.