O Tribunal Superior de Xustiza de Galicia ratificou a condena á Xunta pola morte de Enrique Casanova, o axente forestal corgués que perdera a vida hai cinco anos cando sufocaba un incendio en Guntín. Unha sentenza do 2019 do xulgado Social nº3 de Lugo xa consideraba responsable a Consellería de Medio Rural pola “falta de dilixencia” nas medidas preventivas, pero a Xunta presentara un recurso.
Agora, a resolución do TSXG confirma a condena pola que se obrigaba á Consellería de Medio Rural a indemnizar a viúva do bombeiro. Quique Casanova, que era número 2 do BNG do Corgo e concelleiro nesa corporación, falecera o 27 de xuño do 2015 durante un incendio en Vilamaior (Guntín). O xulgado do social de Lugo consideraba que a Consellaría non actuou de forma dilixente na protección da saúde deste traballador, que morreu dun infarto cando acudía ao aviso do lume.
TRABALLO EN SOLITARIO
“Quique deixounos na soidade, na soidade á que a Xunta obriga a traballar aínda hoxe aos axentes ambientais”, lamentan dende a CIG. A presenza doutro compañeiro en momentos así podería ser “vital”, reivindicación que comparten tamén outros colectivos, como os traballadores de saneamento gandeiro tralo falecemento dun veterinario nas Nogais.
A resolución destacaba tamén o feito de que Enrique Casanova xa sufrira anos atrás unha cardiopatía, polo que tiña solicitado á Administración pasar a unha segunda actividade, atendendo ás recomendacións médicas e dado o estrés e as situacións de risco ás que se ven expostos estes traballadores e traballadoras.
Porén, a Consellaría do Medio Rural non chegou a atender a súa petición nin lle fixo tampouco os recoñecementos médicos periódicos obrigatorios, malia telos solicitado o propio axente. Así pois, o xulgado do social de Lugo recoñecera a responsabilidade da Xunta neste accidente, algo que agora ratifica o TSXG tralo recurso da propia Consellería: “non se pode considerar que a Consellaría actuara de forma dilixente na protección da saúde do traballador”.
SEN CAMBIOS NA SEGURIDADE DOS AXENTES
“Na sentenza demostrouse a actitude de deixadez da Xunta“, subliñan dende a CIG. “Pouco ou nada mudou” no que se refire ás condicións laborais e de seguridade dos axentes forestais. “Para a Xunta somos pouco máis ca números, números que poden traballar con deficiencias no sistema de comunicacións, sen protocolos de seguridade, con formación deficiente, e nin falar de segunda actividade ou de xubilación anticipada”.
E xustifican as súas críticas: “estiveron máis de dous anos sen convocar o Comité de Seguridade e Saúde Laboral de Incendios; desprezan medios como máscaras de calidade, bombas de osíxeno ou refuxios de auxilio”. “Hoxe falamos de Quique pero de seguir así seguiremos caendo e lamentándonos por outras, porque nada ou pouco cambiou en cinco anos”, remata a CIG.
