EFE | O bispo de Lugo, Alfonso Carrasco Rouco, deu orde de constituír un fondo diocesano, dotado con 100.000 euros, para atender “as necesidades caritativas máis urxentes” tras a emerxencia sanitaria e social que provocou a COVID-19.
“Na nova situación na que nos atopamos, as necesidades están a crecer debido á crise económica e social xerada polo confinamento” que está “a afectar á vida cotiá de persoas e familias”, precisa o bispo nunha carta pastoral na que explica como xurdiu e cal é o obxectivo dese fondo diocesano para facer fronte ás necesidades caritativas das parroquias.
Por iso, a Diocese de Lugo decidiu incrementar os fondos recadados coa campaña ‘Sempre Xuntos’, unha iniciativa do clero que permitiu recadar 44.000 euros, para así crear “un fondo diocesano máis permanente, vinculado ás necesidades caritativas máis urxentes das nosas parroquias”.
“Nesta nova normalidade que agora comezamos, necesitaremos que sexa verdade o lema Sempre Xuntos, para non deixar atrás a ninguén e experimentar esa comuñón cristiá de bens, nacida da liberdade da fe”, engade o prelado.
Aos 44.000 euros da campaña ‘Sempre Xuntos’ sumaranse os 32.000 euros achegados pola Diocese de Lugo e outros 24.000 que poñerá Cáritas Diocesana.
