Estas semanas de confinamento deixan tempo para furgar nos caixóns e descubrir obxectos, imaxes e lembranzas que criamos medio esquecidas. Xustamente diso vai o novo reto colectivo que propón Guido Guía nas redes sociais. #RecordandoLugo, que así se chama a iniciativa, anima a compartir fotografías antigas da cidade.
Como eran as rúas de Lugo hai quince, vinte, corenta ou sesenta anos? Que historias e vivencias persoais se agochan tras daqueles retratos tomados na Praza Maior, nas beiras do Miño ou no barrio da Milagrosa? Este “novo reto para seguir construíndo memoria lucense” xurdiu a semana pasada no Twitter, pero os participantes poderán subir as súas imaxes a calquera rede social baixo o hashtag #LugoFavorito.
Tras 3 semanas acumulando + de 500 escritos do #LugoFavorito, lanzamos novo hashtag e novo reto para seguir construíndo memoria lucense nestas semanas: que compartades fotos antigas de Lugo! Moitas grazas amigo @Belmontejo84 por propoñerme esta fermosa idea!! #RecordandoLugo 💚 pic.twitter.com/4YbWDbIcGr
— Guido Álvarez Parga (@guidoalvarezp) April 15, 2020
Aproveitando esta gran iniciativa de subir fotos antigas e colaborando con @guidoalvarezp…que vos parece esta que me fixeron de cativo? Creo que é de finais do ano 86 ou comezos do 87. Sabedes onde é? 😜 #RecordandoLugo pic.twitter.com/6U3slt6TWj
— Javi_vi (@Belmontejo84) April 19, 2020
O guía de turismo Guido Álvarez é moi amigo de lanzar campañas nas redes sociais, como o xa coñecido #LugoPatrimonioMundial ou o máis recente #LugoFavorito, que xa xuntou centenares de textos nos que a imaxinación burla o estado de alarma e acode a eses lugares de Lugo evocados por escrito.
