EFE | A provincia de Lugo ten a menor taxa de letalidade por coronavirus de toda España: un 3’1% fronte ao 10’4% da media estatal, segundo datos do 16 de abril. Tal porcentaxe sae ao poñer en relación o número de falecementos co total de positivos. Segundo o xerente do Sergas en Lugo, Ramón Ares, este dato pode deberse á tardanza da COVID-19 na provincia e á realización de máis probas, entre outras.
O feito de que Lugo teña a letalidade máis baixa de España non se explica só atendendo “a unha única causa”, pero Ares fai fincapé en que o coronavirus chegou á provincia “con certo atraso respecto a outras zonas” do país, o que “permitiu dispoñer de máis tempo” para preparar a resposta do sistema sanitario e “acondicionar estruturas”.
DISPERSIÓN E EXPERIENCIA DO SERVIZO DE XERIATRÍA
Posiblemente, explicou, “a circulación endémica do virus foi menor que noutros sitios”, tamén porque en Lugo non existen “grandes núcleos” habitados e a “poboación está máis dispersa”.
Ademais, aclarou que, precisamente por non “ter unha presión asistencial tan intensa” como outros lugares, o sistema de saúde puido “concentrar os recursos para atender os pacientes” e “traballar en mellores circunstancias”.
Outro aspecto que tamén puido influír, lembra, é “a monitoraxe a domicilio” que xa se estaba facendo dos pacientes crónicos. Iso permitiu “actuar máis rapidamente” ante determinados casos, subliñou. Do mesmo xeito, a “experiencia do servizo de Xeriatría” no “control das persoas maiores” axudou a adoptar “medidas con máis antelación”.
O feito de que “se fixeron moitas máis probas que noutros lugares” de España tamén inflúe nesa estatística. Nese aspecto, Ares lembrou que o Sergas adoptou a decisión de “facer o maior número posible de probas de PCR nos hospitais, nas residencias” e nos círculos de persoas diagnosticadas de COVID-19 para realizar “unha procura activa de posibles infectados”.
