A Consellería de Política Social vén de confirmar os novos casos de coronavirus activos nas residencias de maiores de toda a comunidade. Entre os diagnósticos recentes na provincia de Lugo, atópanse dúas persoas empregadas na residencia da Milagrosa (Lugo) e na de Castro de Ribeiras de Lea (Castro de Rei).
Os casos de coronavirus en activo nas residencias galegas aumentaron nun 45% en 24 horas e xa se contabilizan 346 usuarios e 111 traballadores infectados con COVID-19. Na provincia de Lugo, a incidencia é bastante menor polo momento. Segundo Política Social, hai cinco maiores contaxiados (tres en Foz e dous en Monforte), mentres que o número de empregados diagnosticados ascende a doce (1 en Castro de Rei, 1 na Milagrosa, 1 en Burela, 7 en Foz, e 2 na DomusVi de Monforte).
PROBAS MASIVAS DE CORONAVIRUS
No centro de maiores de Foz, o máis golpeado, o Servizo Galego de Saúde fará finalmente a proba por coronavirus a todos os residentes e traballadores. A aplicación desta medida pódese estender a todas as residencias, segundo as últimas declaracións de Feijóo. “Chegaremos a todos os centros, empezando por aqueles nos que se detectaran casos. Faremos 800 test diarios”, asegurou, tras anunciarse o forte repunte de positivos nos xeriátricos.
CENTROS DE ATENCIÓN PARA PERSOAS CON DISCAPACIDADE
Pola súa parte, nos Centros de Atención para Persoas con Discapacidade, os casos confirmados pola Xunta ascenden a 27 usuarios (sete deles en Sarria) e 7 traballadores (con casos activos en Sarria e Monforte).
Podes ler a información completa no Galicia Confidencial.
