Axentes da Policía Nacional detiveron un veciño de Lugo de 44 anos, con antecedentes, por un suposto delito de agresión sexual ao estar acusado de abusar da filla menor da súa parella no 2018.
Segundo informou a Policía Nacional, a nai da vítima denunciou os feitos na tarde deste xoves 26 de marzo, momento no que soubo do ocorrido dous anos atrás. A denunciante telefonou a dependencias da Policía Nacional e comunicou que a súa parella abusara da súa filla menor no ano 2018.
Tras entrevistárense os efectivos policiais coa denunciante, solicitaron a intervención do Grupo Especializado de UFAM, que se presentou no domicilio. Os policías comprobaron, daquela, que no ano 2018, mentres a nai da menor estaba fóra do domicilio, o padrastro supostamente abusara sexualmente dunha das fillas da súa parella.
A Policía Nacional explicou que os feitos foron corroborados pola irmá da vítima e puntualizou que as irmás non lle contaron nada á súa nai ata o día da denuncia.
Por este motivo procedeuse á detención do presunto autor e ao seu traslado a dependencias da Policía Nacional, antes de ser remitido á autoridade xudicial e a súa posta a disposición.
