Investigadores da Universidade de Texas en Austin descubiron que máis do 10% dos pacientes de coronavirus adquiren o contaxio a través de alguén que nin sequera presenta síntomas. O alto número de persoas que infecta cada portador do Covid-19 e o pouco tempo que tarda en propagarse (menos dunha semana) confirman que estamos diante dunha epidemia cunha elevada velocidade de transmisión.
O estudo, publicado na revista Emerging Infectious Diseases e recollido polo National Geographic, é unha das primeiras investigacións que ten en conta os transmisores asintomáticos do coronavirus. Logo de examinar máis de 450 informes de casos de infeccións en 93 cidades chinesas, o equipo de investigadores puido concluír que arredor dun 10% dos contaxios se producía vía transmisión asintomática.
“A transmisión asintomática fai que a contención do virus sexa tremendamente complicada”, segundo explicou a profesora Laura Meyers nunha nota de prensa recollida polo National Geographic. De aí que estean xustificadas medidas de control tan severas como as corentenas, impostas en España dende o pasado fin de semana, cando se aprobou o estado de alarma.
CONTAXIOS CADA CATRO DÍAS
Esta mesma profesora comparou a capacidade exponencial de transimisión do Covid-19 co virus do ébola. No primeiro caso, falamos de catro días de marxe para un segundo contaxio, mentres que o ébola tardaba varias semanas en propagarse. “Ante semellante ameaza, non queda máis remedio que movernos rapidamente”, asegura Meyers.
