InicioSociedadeUn repaso ao 2019 a través das noticias máis lidas no Lugo...

Un repaso ao 2019 a través das noticias máis lidas no Lugo Xornal

Conflitos laborais no Carrefour de Lugo, o labor da comisión de festas de Castroverde, leas en campionatos de caza ou unha entrevista a Benedicta Sánchez. Estas son algunhas das pezas que forman parte do ránking de noticias máis lidas no Lugo Xornal durante o pasado ano.

PUBLICADA O

- Advertisement -

Co ano 2020 aínda comezando a espelirse, dá tempo a botar a vista atrás para facer un repaso do 2019 que rematamos. Facémolo a través das pezas máis lidas no Lugo Xornal durante o pasado ano. Velaí vai:

9. O propietario dun suposto puticlub absolto de prostitución porque el só lles cobraba ás mulleres “polo almorzo, a comida e a cea”

Na novena posición, atópase unha noticia que abre o debate sobre a impunidade nos casos de prostitución. Desta volta, os feitos estaban ligados a un club de Guntín onde, presuntamente, obrigaban a mulleres estranxeiras a exercer a prostitución en condicións precarias. A xustiza non observou “garantía no testemuño” dunha das denunciantes.

8. “Cando che gusta onde vives e queres facer cousas pola túa vila, paga a pena ser da comisión de festas”

Se cadra o poderoso sentimento de pertenza a un lugar é o culpable de que tal peza apareza na oitava posición deste ránking. Castroverde é o eixe sobre o que xira o texto, no que debullamos o traballo que se agocha tras as festas patronais dunha vila coma esta.

7. Desarticulado en Becerreá un punto de venda móbil de droga a menores

O sétimo posto é para unha nova que facía referencia a uns feitos acontecidos en abril do 2019, cando un veciño de Samos foi detido no concello becerrego por traficar con droga polo miúdo.

Benedicta Sánchez | Silvia López

6. Benedicta Sánchez: a vida de película desta muller do Corgo antes de ser unha estrela en Cannes

Benedicta Sánchez é unha das personaxes do ano. E é do Corgo! Esta muller de 84 anos supuxo unha revolución da que tamén se fixo eco o Lugo Xornal. O seu papel no filme ‘O que arde’ (Oliver Laxe, 2019) valeulle un nomeamento aos Goya na categoría de actriz revelación. Conquistou o corazón dos galegos cando bailou unha muiñeira na alfombra vermella de Cannes, pero o certo é que paga a pena escoitala falar da súa vida antes de se converter nunha estrela que presenta as badaladas ou que acapara flashes. Nesta entrevista, agasállanos con relatos da infancia e da mocidade.

5. Carrefour terá que indemnizar unha empregada de Lugo á que impediu conciliar

A precariedade e o incumprimento dos dereitos laborais tamén foron, desafortunadamente, unha constante durante o 2019. Aos traballadores de Lugo non lles foron alleas estas problemáticas.

4. Historias de prostitución e migración: dende as galegas explotadas en Cuba ata o caso Carioca

Unha das últimas reportaxes do 2019 cóase na cuarta posición deste ránking de pezas máis lidas. O texto artéllase arredor de ‘Hijas de Galicia’, unha entidade nacida na Cuba de hai un século para protexer as mulleres galegas que migraban alí e eran explotadas sexualmente. As similitudes coa actualidade son tan evidentes como indignantes. Bo exemplo diso é o Caso Carioca, aquí en Lugo.

O TOP 3

3. Renuncia o alcalde de Baralla unha semana despois de tomar posesión do cargo

No top 3 das noticias máis lidas atópase a renuncia de Manuel González Capón como rexedor do concello de Baralla. Facíao por motivos de saúde, tres días antes de falecer.

Cartel electoral humorístico de Kang e Kodos.

2. A Policía tramita denuncia por delito electoral aos impulsores dunha iniciativa cómica-humorística

Uns carteis humorísticos que presentaban dous extraterrestres como candidatos electorais desataron unha polémica inesperada cando a Policía denunciou os veciños que os colgaran. Este “atentado contra as liberdades” causou moito interese entre as lectoras e lectores do Lugo Xornal.

1. [Vídeo] Un cazador dispara contra activistas en Castro

E na primeira posición deste ránking de noticias máis lidas, atopamos unha peza sobre o altercado producido durante un campionato de caza de raposo en Castro de Rei. Nel, un cazador disparou a un grupo de activistas contrarias á celebración do torneo. O suceso incendiou as redes.

OS XORNAIS DE LUGO MEDRAN: MÁIS DE 700.000 LECTORES NO 2019

O Lugo Xornal vai medrando e consolídase coma un medio de referencia para Lugo e a súa contorna. Canda el, tamén o fan os seus compañeiros Xornal de Lemos e Xornal da Mariña. Proba diso son as cifras que manexan en canto a usuarios e visitas. Os tres medios, no seu conxunto, rexistraron un total de 729.481 lectores no pasado 2018, mentres que o número de visitas ás páxinas ascendeu ata o 1.695.360. Dende o equipo dos Xornais de Lugo, amosamos a nosa gratitude e o compromiso de seguir traballando para ofrecer información de calidade e interese para as luguesas e lugueses.

ÚLTIMAS

A Deputación de Lugo culpa á Xunta de “incumprir” o proceso de estabilización e esixe o fin da “temporalidade”

O pleno da Deputación Provincial de Lugo aprobou este martes unha moción do Grupo Provincial Socialista...

Adega denuncia que a captación de auga para Altri provocará “problemas de abastecemento”

A Asociación para a Defensa Ecolóxica de Galiza (Adega) censura a solicitude de captación...

Remite o temporal que deixa moita neve, inundacións e estradas cortadas en Lugo

Os efectos do temporal remitiron nas últimas horas en Galicia, cun descenso no volume de precipitacións...

A neve dificulta a circulación en Lugo e os camións non poden circular pola LU-633 en Pedrafita do Cebreiro

A caída de neve dificultou a circulación na provincia de Lugo e, en concreto,...