O avogado que se ocupa da defensa do ex alcalde de Lugo, José López Orozco, asegurou que o feito de que a xuíza Pilar de Lara siga á fronte do Xulgado de Instrución Número 1 da capital lucense, despois da sanción imposta polo Consello Xeral do Poder Xudicial podería desembocar nunha “cadea de nulidades”.
O letrado Gregorio Arroyo informou a EFE que o feito de que a xuíza Pilar de Lara, instrutora de causas como a Pokemon ou o caso Garañón, siga á fronte do Xulgado, “contravén” incluso a “Lei Orgánica do Poder Xudicial”.
Arroyo asegura que esta situación é “rarísima”, porque a sanción é “firme” desde o momento no que se “esgota a vía administrativa e se lle notifica”, con independencia de que recorra ao Tribunal Supremo.
“Tería que abandonar xa o Xulgado. Non sei se pode haber incluso un delito de desobediencia” por parte da maxistrada, engadiu.
Ao seu xuízo, a lei é “clara” e “a sanción é executiva cando se esgota a vía administrativa”, polo que ao permanecer á fronte do Xulgado, e seguir ditando resolucións, “pode dar lugar a unha cadea de nulidades”.
