A portavoz do PP na Deputación de Lugo, Elena Candia, xustificou a petición de pleno extraordinario, que finalmente se convocou o vindeiro martes 20 de agosto, para que “se disipen as dúbidas sobre que queren facer cos compromisos adquiridos cos distintos concellos” da provincia, sobre as 16 residencias para maiores programadas polo goberno provincial, un bipartito que comparten socialistas e nacionalistas.
Candia apelou a que “non son só compromisos cos concellos, senón que son compromisos coas persoas”. “Que digan alto e claro se van manter o modelo de xestión”, afirmou.
Sobre ese modelo, a tamén alcaldesa de Mondoñedo lembrou como o goberno anterior presidido polo tamén socialista Darío Campos presumía do mesmo e agora o que quere saber é “se van facer política coas residencias que para eles era importante utilizalas como arma de debate contra a Xunta de Galicia”.
“Non se fai o pleno por ningún capricho, faise porque era a única posibilidade que tiñamos de ter unha contestación que agora quedará recollida nunha acta”, argumentou.
Así mesmo, os populares requiren explicacións “por informacións contraditorias“, despois de que o presidente da Deputación, José Tomé, dixese que “non ían facer ningunha máis e tamén o que din os seus socios de goberno (o BNG) que interpretan a integración de Suplusa (a sociedade do chan provincial) como o primeiro paso para dinamitar a institución provincial; o próximo parece que serán as residencias”, dixo.
“Non temos clara ningunha folla de ruta. Que expliquen que van facer coas residencias. Tamén dicía o outro día o presidente que non lle deixamos cen días de goberno, pero aquí non hai cambio de goberno, aínda que reneguen do anterior”, resolveu.
