A Fundación Rof Codina e a Facultade de Veterinaria do campus de Lugo (USC) amplían a súa oferta formativa cara ao próximo curso 2019-20 cun máster en alimentación e nutrición animal. Trátase dun posgrao orientado a capacitar os profesionais do sector tanto en labores de clínica asistencial como na industria de alimentación de mascotas.
Baixo a denominación de ‘Fisioloxía e nutrición de pequenos animais’, este máster é unha posta da USC para atender as necesidades de especialización dos servizos veterinarios. O director do grao explica que se responde así a unha demanda social que implica a busca deste tipo de profesionais por parte das empresas do sector. Neste senso, o catedrático de Fisioloxía da Facultade de Veterinaria da USC Luis Felipe de la Cruz Palomino, salienta que a nutrición das mascotas é un dos ámbitos de especialización máis puxantes na actualidade.
PROGRAMA DO POSGRAO
O programa do máster, para o que se ofrecen 15 prazas e que se impartirá ao longo dun curso académico, está organizado arredor de nove módulos formativos. A temática abrangue cuestións como os principios xerais de nutrición, necesidades específicas de cans e gatos, procesos de fabricación de pensos e produtos de alimentación animal, control de calidade de alimentos, dietas, pautas alimentarias, alimentación fisiolóxica, nutrición clínica e perspectivas do mercado. Un traballo de fin de máster e un período de prácticas en empresas completan o programa deste máster propio da USC, que contará entre o seu cadro de docentes con profesorado da Facultade de Veterinaria da USC, facultativos/as do Hospital Veterinario Universitario Rof Codina e profesionais de recoñecido prestixio do sector da nutrición de mascotas.
O prazo de pre inscrión neste posgrao permanecerá aberto na web da USC ata o 6 de setembro. O prazo de matrícula poderá formalizarse entre os días 16 e 20 do mesmo mes. As sesións formativas de carácter presencial desenvolveranse entre setembro deste ano e xuño de 2020 nas instalacións da Facultade de Veterinaria de Lugo e do hospital veterinario Rof Codina en dúas xornadas semanais, unha sesión de tarde, de luns a venres, e os sábados pola mañá.
