O secretario en Galicia da Unión Federal de Policía (UFP), Miguel González, denunciou este venres que a Policía Xudicial e os axentes de Estranxeiría da comisaría de Lugo non dispoñen de chalecos antibalas.
González lembrou que “o goberno ten a obrigación de dotar os seus traballadores dos medios adecuados para estar na rúa”. “Somos un servizo público que debería de estar como Deus manda e non esperar que ocorra unha desgraza para darlle solución”, explicou. Así, censurou que “a día de hoxe todos os grupos da Policía Xudicial e Estranxeiría, que están na rúa, non teñen o seu chaleco personalizado”. “Desde a UFP dicimos basta, e que se doten a todos os policías dos medios adecuados para estar na rúa”, subliñou.
O sindicalista estendeu esta carencia ás mulleres policía, que supoñen unha quincena dentro do cadro de persoal. Elas tampouco contan con chalecos adaptados, lamenta. “No seu día pasou o que pasou en Vigo con Vanessa (axente morta durante un tiroteo en 2014), déuselle bombo a iso de que se ían a adaptar os chalecos para as compañeiras policías e non se fixo”, protestou.
Miguel González puntualizou que agora vai haber un investimento “importante” en pantalóns e camisas. “É importante que a policía non vaia coas camisas rotas ou recosidas, pero tamén é certo que ten que haber prioridades”, matizou.
Puxo como exemplo a “última actuación” en Madrid dunha axente que tivo que sortear, con chaleco, a un delincuente que a ameazaba cun coitelo. González ten claro que “de non levar chaleco, hoxe estariamos a falar dunha desgraza”. “Quero tamén desde aquí felicitar aos meus compañeiros (de Madrid) porque souberon ter unha temperanza importante”, así como a compañeira, que estaba no seu “primeiro traballo na rúa”, finalizou.
