O cada día máis famoso @GalegoDeCaracas, Simón Rodríguez Landaeta, escritor e xestor cultural venezolano con raíces galegas e afincado en Lugo, ven de gañar o concurso de poesía “O Facho” na súa edición do 2023.
Simón chegou á cidade amurallada hai catro anos coas Bolsas Excelencia Mocidade Exterior (BEME) para as e os descendentes de galegos, co primeiro obxectivo de estudar o Máster en Servizos Culturais do Campus Terra USC.
Agora, neste mes de maio, ven de acadar este premio que o anima e impulsa no seu percorrido como escritor.
“O xurado valorou a súa transparencia e interese pola comunicación, a temática do retornado con isotopías que desenvolve á maneira de puzzle, non exentas de pinceladas impresionistas con recendos ecolóxicos, baseadas na tradición, nos valores dos antergos e resoltas con fermosas imaxes”
