As paredes de Lugo seguen a ser escollidas para os murais máis rechamantes e traballados do país. O derradeiro destes conxuntos pictóricos virá tras a iniciativa do Colexio Profesional de Xornalistas de Galicia en defensa dun mural a prol da liberdade de expresión, as mulleres xornalistas e a igualdade de xénero na profesión; traballo que correrá ao cargo de Xoana Almar. O traballo vén en colaboración coa Concellería de Cultura do Concello de Lugo e empeza a ser xa unha realidade sobre na parede circular dun dos edificios da antiga Frigsa, no lucense parque da Milagrosa.
Dende o CPXG explican que mural foi comezado este martes 3 con motivo da celebración do Día Internacional da Liberdade de Prensa. Segundo explican, a artista traballa nunha proposta fundamentada nun dos principos básicos do xornalismo que resume a profesión en tres accións: ir, ver e contar. “Ao tempo”, engaden, “visibiliza como as mulleres constitúen na actualidade a maior forza de traballo nas redaccións de todo o país e tamén a importancia de escoller voces e olladas femininas como fonte de información para reflectir axeitadamente a pluralidade do noso mundo”.
O proxecto encádrase na terceira edición do festival de arte urbano Culturban, organizado pola área de Cultura do Concello de Lugo e o Espazo Lupa Arte. O artista lucense Iago Eireos coordina este festival, que procura as interaccións entre as expresións creativas plásticas e o urbanismo a través de intervencións nos espazos públicos.
Xoana Almar, pola súa banda, formouse como ilustradora, economista e antropóloga. Estudou en Granada e alí comezou a traballar no eido da pintura a partir do 2008. No 2013 volveu a Galicia para constituír xunto a Miguel Peralta e Raquel Doallo a cooperativa Cestola na Cachola, onde traballa como muralista, pintora e ilustradora. No seu traballo hai influencias de diferentes nomes da pintura galega, tanto clásicos como actuais.
