Galicia mantense por segunda xornada consecutiva por baixo do milleiro de contaxios de Covid-19 tras reducirse a 781, que supoñen 30 menos que o día anterior, mentres que os pacientes hospitalizados por este coronavirus aumentan lixeiramente a 345, catro máis. Pola súa banda, os casos activos descenden a 16.471, despois de reducirse nas sete áreas sanitarias, e a taxa de positividade cae a un 12%.

Segundo os datos actualizados pola Consellería de Sanidade este martes con rexistros de ata as 18,00 horas do luns, recollidos por Europa Press, por áreas sanitarias, a presión hospitalaria descende nas de Ferrol e Santiago de Compostela; pero aumenta lixeiramente na de Lugo, que reduce a sete os ingresados en UCI pola Covid –un menos– pero aumentan a 39 os doutras unidades –dous máis–.

MENOS CASOS ACTIVOS

Os casos activos de Covid manteñen a tendencia descendente por quinta xornada consecutiva e baixan 16.471, que representan 353 menos que o día anterior, ao haber de novo máis altas (1.133) que contaxios (781), ao que se suma un falecemento.

Con respecto a hai unha semana, Galicia conta con 2.300 casos activos de Covid-19 menos que os 18.771 rexistrados o pasado martes 3 de agosto. Por áreas sanitarias, os casos activos descenden nesta ocasión nas sete, e caen na de Lugo (-80) que queda con 1.834 casos.

CONTAXIOS EN DESCENSO

Tamén os novos contaxios de Covid-19 mantéñense por segunda xornada consecutiva por baixo do milleiro –cifra da que Galicia baixou o luns 2 de agosto por primeira vez desde o 20 de xullo, pero que superaba desde o mércores de novo– e redúcense a 781, que implican 30 menos que os 811 cos que arrincou esta semana e 56 menos que os 837 de fai sete días.

No conxunto de Galicia foron confirmados 790 positivos por Probas Diagnósticas de Infección Activa (PDIA) no último día, oito menos que o día anterior, dos cales 73 corresponden á de Lugo.