O BNG avogou este luns en Lugo por converter a defensa das infraestruturas e as comunicacións de Lugo nun dos “eixos centrais” do traballo tras as eleccións xerais do 29 de novembro. Neste sentido, a portavoz nacional da formación, Ana Pontón, reclamou “un tren do século XXI” para a provincia lucense.
Así o trasladou tras manter unha reunión de traballo cos candidatos e candidatas ao Congreso e ao Senado pola circunscrición lucense para analizar as principais necesidades da provincia e definir as prioridades políticas de face á próxima lexislatura.
A cabeza de lista da candidatura, Olalla Rodil, destacou que existe unha preocupación compartida por veciños e sectores económicos das distintas comarcas ante o estado de “abandono” das infraestruturas, tanto por estrada como ferroviarias, advertindo de que esta situación “está a lastrar as oportunidades da provincia de Lugo”.
Entre os exemplos concretos, referiuse a a autovía A-54, “que acumula máis de dúas décadas de promesas e incumprimentos” e que aínda ten pendente a finalización do tramo entre Melide e Arzúa. Tamén denunciou a situación da liña ferroviaria da Mariña, as deficiencias das conexións ferroviarias do sur da provincia, o estado da estrada N-640 e a “falta de desenvolvemento” do porto seco de Monforte.
Sobre este último proxecto, Rodil lembrou que foi presentado como un gran nodo loxístico para conectar Galicia mediante o transporte ferroviario de mercadorías, pero que, despois de anos, “é un mar de cemento e de silvas”.
A candidata nacionalista asegurou que o BNG quere dar visibilidade a todas estas reivindicacións e defender que os habitantes de Lugo teñan as mesmas oportunidades que o resto da cidadanía. “Queremos que esta provincia teña unha voz forte, que se defenda alí onde se toman decisións transcendentais para as nosas vidas, como neste caso Madrid e o Congreso dos Deputados”, manifestou.
Rodil tamén expresou a súa confianza en que a formación poida conseguir por primeira vez un deputado do BNG pola provincia de Lugo. “Estamos convencidas de que podemos conseguir representación este 29 de novembro, facer historia”, afirmou, garantindo que tanto ela como o resto de integrantes da candidatura traballarán para lograr ese obxectivo e conseguir que Lugo teña “o que se merece, o que necesita”.
LUGO QUERE TREN
Pola súa banda, Pontón insistiu en que Lugo necesita gañar peso político para deixar de estar “relegada” nas decisións que afectan as súas infraestruturas e ao seu futuro económico. A portavoz nacional do BNG lamentou de que a provincia leve anos “quedándose atrás”.
Ademais, puxo especial énfase no ferrocarril, ao que definiu como unha infraestrutura fundamental para o futuro económico e social do territorio. “Lugo ten que ter un tren do século XXI”, defendeu, asegurando que as comunicacións ferroviarias deben converterse nunha prioridade dos investimentos estatais. Para iso avanzou que o partido presentará unha serie de propostas nas que se inclúe un cartafol que se chama “Lugo quere tren”.
Neste sentido, Pontón presentou varias propostas concretas para mellorar as conexións ferroviarias, como a modernización da liña entre Lugo e A Coruña e a conexión ferroviaria directa entre Lugo e Santiago de Compostela. Para iso, o BNG expón unha actuación de aproximadamente 27 quilómetros que permitiría conectar as estacións de Curtis e Ordes e crear un traxecto directo entre ambas as cidades.
A terceira liña de actuación pasa por ampliar os horarios, mellorar as frecuencias e aumentar os servizos ferroviarios. Pontón incidiu en que a futura estación intermodal de Lugo necesita contar con trens suficientes para garantir unha conexión efectiva tanto coa cidade como coas comarcas da súa área de influencia.
A dirixente nacionalista criticou que, a pesar das maiorías absolutas que tiveron tanto o Partido Popular como o Partido Socialista, a provincia siga arrastrando “importantes carencias”. “Xa está ben de discriminación, hai que pór a Lugo no mapa”, reclamou.
Finalmente, o líder do BNG na cidade de Lugo, Rubén Arroxo, asegurou que a formación será capaz de conseguir representación nas próximas eleccións e defendeu a necesidade de contar en Madrid cunha voz propia que “coñeza os problemas do territorio e traballe para resolvelos”.
“Estamos convencidos de que o BNG vai ter unha representación que realmente é necesaria, unha representación galega, unha representación que se debe aos intereses de aquí”, afirmou. Arroxo puxo como exemplo o traballo realizado polos nacionalistas en materia de infraestruturas ferroviarias e viarias esta última lexislatura, asegurando que foron quen levaron ao Congreso propostas para mellorar as comunicacións e reclamar a finalización das autovías pendentes.
