A ministra de Traballo e Economía Social, Yolanda Díaz, animou á poboación a mobilizarse polos seus dereitos “porque estes non caen do ceo, hai que pelexalos”.
Así o fixo saber este sábado na localidade de Cervantes, onde participou nun foro sobre economía social e reto demográfico xunto ao director de cinema Oliver Laxe.
Díaz foi contundente co seu apoio aos mozos mobilizados en distintas prazas do país e animou á poboación a sumarse a estas iniciativas. “Non van gañar eles se a xente de ben se mobiliza”, sinalou, convidando á poboación non só a saír á rúa, senón tamén a reivindicarse nos centros de ensino e en todos os organismos.
A ministra insistiu en que a mobilización debe desenvolverse de forma pacífica e reclamou que a cidadanía “colla nas súas mans a democracia”. “Os dereitos non caen do ceo”, afirmou, antes de defender que é necesario mobilizarse para avanzar en dereitos sociais.
“A democracia non se decide nos despachos, decídeo a xente na rúa, colléndoa coas nosas mans”, dixo a responsable de emprego de Sumar, que lembrou as barreiras que tivo que salvar para sacar adiante os seus proxectos e animou á poboación a “non renderse porque é a forza que temos”.
Neste punto, reivindicou algunhas das medidas impulsadas durante a súa etapa á fronte do Ministerio de Traballo e puxo como exemplos a reforma laboral e as subidas do salario mínimo. Asegurou que volverán traballar para incrementar o salario mínimo e atribuíu parte dos avances conseguidos á mobilización social.
“BLOQUEARON O PARLAMENTO, PERO NON A DEMOCRACIA”
Referiuse a a votación do venres no Congreso pedindo “non deixarse asoballar polo resultado”. “Onte bloquearon o Parlamento pero non bloquearon a democracia, nin aos mozos, nin ás mulleres, nada de decepcións”, indicou, repetindo a necesidade de “mobilizarse sen parar porque é unha indecencia que esteamos en mans dos fondos voitre”.
A ministra centrou boa parte das súas críticas na situación da vivenda. Sinalou que o problema non afecta unicamente ás grandes cidades e citou expresamente lugares de Galicia como A Coruña, Santiago ou Ferrol para remarcar, segundo o seu diagnóstico, as dificultades existentes para acceder a un aluguer.
Díaz lembrou que o dereito á vivenda é fundamental e pediu “un paso adiante para que o dereito á vivenda poida abrirse camiño”. “Se nos desanimamos, eles gañan”, afirmou, en referencia a quen, ao seu xuízo, pretenden que as mobilizacións perdan forza.
En relación coa votación parlamentaria, culpou da situación directamente a Alberto Núñez Feijóo, Santiago Abascal e Miriam Nogueras, aos que sinalou como “os responsables de calquera desaloxo que se produza a partir de agora en España”. “Non teñen corazón”, concluíu.
As súas palabras chegan despois de que PP, Vox e Junts rexeitasen os decretos relacionados coa vivenda aos que se refería a vicepresidenta. A propia Díaz situou aos dirixentes destas formacións como responsables políticos das consecuencias que, na súa opinión, poidan derivarse desa decisión.
“QUEREMOS ECONOMÍAS QUE DEFENDAN A VIDA”
Na súa intervención, Díaz reivindicou o papel da economía social e do cooperativismo como modelos vinculados ao territorio, ao emprego de calidade e á participación democrática.
A vicepresidenta defendeu que a economía social constitúe unha alternativa ao que definiu como “economía especulativa” e destacou que se trata dun modelo “horizontal”, “feminista”, “ancorado nos territorios” e orientado a xerar emprego “de calidade e inclusivo”.
Neste sentido, puxo como exemplo as iniciativas desenvolvidas na contorna rural dos Ancares e reivindicou a necesidade de combinar a defensa do territorio coa creación de actividade económica e emprego. “Non queremos economías especulativas, queremos economías que defendan a vida”, sinalou.
Díaz tamén relacionou a economía social co reto demográfico e chamou a atención sobre a evolución da poboación na provincia de Lugo. Segundo expuxo durante o acto, na provincia rexístranse 1.429 nacementos fronte a preto de 5.000 defuncións, unha situación que, ao seu xuízo, fai necesario “abordar o problema demográfico e tamén a chegada de poboación migrante”.
A ministra defendeu así mesmo a necesidade de apoiar actividades económicas vinculadas ao territorio, como as gandarías extensivas, e destacou a importancia de contar con poboación migrante para manter a actividade e os servizos nas zonas rurais.
A CULTURA COMO “DINAMIZADOR” DO TERRITORIO
Tivo tamén palabras de eloxio para Oliver Laxe, presente no foro, a quen situou como exemplo de persoas que apostan por vivir e desenvolver a súa actividade no rural. Díaz asegurou que ela mesma defende permanecer nestes territorios “por egoísmo” e reivindicou o medio rural galego como un espazo desde o que desenvolver proxectos económicos, culturais e sociais.
A vicepresidenta aproveitou ademais a súa presenza en Galicia para reivindicar o papel da cultura e das asociacións culturais na dinamización do territorio, e citou, entre outras, á Fundación Uxío Novoneyra, vinculada ao poeta de Ou Courel e coa que, segundo explicou, mantén unha relación familiar desde a súa infancia.
A ministra aproveitou tamén a súa intervención para reivindicar o papel internacional da economía social. Asegurou que España constitúe unha referencia neste ámbito e sinalou que a estratexia española de economía social presenta un grao de cumprimento do 89 por cento.
Díaz defendeu que o modelo de economía social está a ser obxecto de “atacada” en diferentes organismos internacionais. Neste contexto, mencionou o traballo desenvolvido con países como Senegal e Corea do Sur para impulsar unha nova resolución sobre economía social en Nacións Unidas. “Necesitamos máis ben común, máis alegría e, desde logo, máis amor para o mundo”, reivindicou.
A ESQUERDA, “PREPARADA” PARA O “RETO” ELECTORAL
Sobre as próximas eleccións nacionais non avanzou se o presidente do Goberno ten intención de adiantar a convocatoria. “É algo que é competencia exclusiva súa”, sinalou. Díaz recoñeceu que mantén conversacións con Pedro Sánchez, aínda que recalcou que a decisión de disolver as Cámaras e convocar eleccións corresponde exclusivamente ao presidente do Goberno.
Neste sentido, asegurou que o que teñen que facer os demais membros do Goberno é “seguir traballando polo país, dar un paso adiante e defender o ben común”.
Ademais, asegurou que “a esquerda está preparada” para o reto electoral. Terminou lembrando á cidadanía “de esquerdas e progresista” que o pobo está en marcha e chamou a afrontar o futuro “con alegría, con decencia, coa convicción da razón”, defendendo que existe futuro para este espazo político.
