O Senado pediu, coa abstención do PSOE, a adopción de medidas para reforzar o persoal de Correos na provincia de Lugo, “cubrindo todas as vacantes estruturais e garantindo un número de efectivos suficiente para prestar o servizo con normalidade”.
A iniciativa, que defendeu o popular José Manuel Balseiro, tamén demanda cubrir vacantes e dotar ás oficinas dos medios materiais e organizativos “adecuados para asegurar a regularidade, calidade e puntualidade do servizo postal universal”.
Na súa intervención, Balseiro cargou contra o Goberno central e en concreto contra o presidente Pedro Sánchez, a quen acusou de estar “a degradar a maior empresa pública de España”. “Converteu Correos noutro espazo de control político”, afirmou.
“Menos persoal, máis precariedade, máis atrasos, máis oficinas saturadas e peor servizo para os cidadáns. Especialmente no rural lucense”, advertiu.
“A SANIDADE IMPÓRTALLES MOI POUCO”
O socialista César Alejandro Mogo, que defendeu unha emenda que foi rexeitada, atribuíu “dramatización” ao PP, mentres Balseiro replicou que a iniciativa “nace das queixas reais de veciños e traballadores da provincia”.
“Que curioso que cando van ás oficinas de Correos non se fixan nos centros de saúde. A sanidade impórtalles moi pouco, a atención primaria galega (…) Menos contos e máis traballo”, respondeu o senador socialista.
