Os deputados do Grupo Provincial Popular critican a decisión que onte tomaron PSOE e BNG de enviar a José Tomé como representante da Deputación de Lugo á presentación da Volta a España feminina, celebrada en Ribeira.
O voceiro provincial popular, Antonio Ameijide, denuncia que neste acto José Tomé ocupou o lugar reservado para o representante da Deputación de Lugo, a pesar de que no evento estaba presente Pilar García Porto, voceira do goberno provincial. “Vemos como claramente PSOE e BNG quitaron a careta e decidiron que Tomé saíse da sombra e pasase a ser a imaxe institucional da Deputación de Lugo”, criticou.
Neste senso, Antonio Ameijide afirma que “esta é a enésima provocación” de PSOE e BNG “ao permitir que un presunto acosador sexual sexa a imaxe institucional da Deputación de Lugo ocupando o lugar institucional das deputacións na presentación da Volta a España feminina”.
O voceiro provincial popular pregunta a Carmela López e a Efrén Castro “por que non acudiron a esta presentación e cederon a representación institucional a José Tomé”, ao que engade que “tamén habería que preguntar a Pilar García Porto por que, sendo a voceira do goberno, non realizou esa labor de representación institucional ocupando o seu lugar xunto aos outros presidentes de deputacións e representantes”.
“Está claro que non hai auga que os lave, xa que, baixo ningún concepto, poden alegar descoñecemento xa que a persoa que encubriu os presuntos acosos durante meses estaba presente no evento”, afirmou.
Ademais, Antonio Ameijide ve como “outra provocación do PSOE” que Monforte e Antas de Ulla sexan inicio e final da mesma etapa. “É curioso que a cidade da que é alcalde o presunto acosador sexa inicio de etapa e a cidade da que é alcaldesa a persoa que o tapou durante meses sexa a meta”, subliñou.
