O goberno galego trasladou o seu apoio á candidatura de Lugo para ser sede da Axencia Estatal de Saúde Pública, recentemente creada polo Executivo central, e amosou a súa oferta de “máxima colaboración” para que a cidade sexa elixida. Así, tras establecerse os requisitos marcados polo Estado para esa sede, o Consello da Xunta avala a proposta que vaia elevar o Concello de Lugo e achegará á entidade municipal os informes sectoriais favorables dos departamentos autonómicos implicados: Turismo, Transportes, Vivenda, Axencia Galega de Infraestruturas e Educación.
Para reforzar a candidatura, o goberno galego tamén ofreceu o edificio do departamento territorial da Consellería de Sanidade como “posible localización alternativa”. Nese edificio sitúase xa o Laboratorio de Saúde Pública de Galicia e dispón de 4.900 metros cadrados, 900 metros máis que os esixidos. Respecto diso, o goberno galego sinalou que o edificio (propiedade da Xunta e que sería cedido ao Estado) está disposto para que, chegado o caso, a axencia estatal poida entrar en funcionamento de maneira inmediata, xa que conta con oficinas administrativas, laboratorios, salón de actos e garaxe, e as adaptacións menores que fosen necesarias serían compatibles co inicio da actividade.
No caso de que se optase por esa localización, indicaron fontes autonómicas, a Consellería de Sanidade xa ten previstas opcións de traslado do Laboratorio de Saúde Pública de Galicia: ou ben a dúas plantas do hospital de Calde, ou ao soto do HULA. Mentres, o departamento territorial poderíase desprazar á cuarta planta do Centro Integral de Saúde de Lugo ou a un edificio do INSS da Praza de Ferrol. As estimacións apuntan que a Axencia de Saúde Pública contará co 60 traballadores o primeiro ano e, en función do despregamento e das posibilidades orzamentarias do Goberno central, podería chegar a empregar a 300 persoas.
VALORES DA CANDIDATURA
A cidade de Lugo, como posible sede, conta cunha rede de acceso a medios de transporte público, tanto por estrada como por tren, e está a 90 quilómetros do aeroporto de Santiago-Rosalía de Castro. Así mesmo, dispón dunha oferta axeitada de aloxamento para visitas institucionais e de traballo, e dunha oferta inmobiliaria suficiente para a residencia do persoal. A iso súmase o potencial do campus universitario.
Finalmente, a Xunta destacou o liderado de Galicia en materia de saúde pública, con medidas como a próxima entrada en vigor da lei que prohibe o consumo e venda de cigarros electrónicos e bebidas enerxéticas a menores, a adquisición de vacinas de alta carga contra a gripe, o seu calendario de vacinación (“referencia a nivel internacional”), os seus programas de detección precoz e cribados, ou proxectos como Xenoma Galicia.
