O alcalde de Lugo, Miguel Fernández, expresou este martes a súa “profunda preocupación” polo novo “atraso” na execución da autovía Nadela-Sarria, unha infraestrutura que cualificou de “fundamental para o desenvolvemento económico e social da cidade e de toda a súa área de influencia”. Neste contexto, lembrou que esta obra tiña como data de conclusión 2026 e que, agora, “non estará finalizada, como mínimo, ata 2028”.
Así o manifestou despois de que o Consello da Xunta aprobase este luns definitivamente o proxecto de trazado para culminar a transformación do corredor Nadela-Sarria nunha vía de alta capacidade, que supón a última fase da autovía que unirá Lugo e Sarria. En concreto, o Consello deu luz verde ao proxecto e ao estudo de impacto ambiental no tramo Nadela-A Pobra de San Xiao, ao seu paso polos concellos de Lugo, O Corgo e O Páramo, que suporá un investimento de 37,4 millóns de euros. Trátase da conversión en autovía do último tramo do corredor Nadela-Sarria (CG-2.2) para completar o desdobre.
Fernández lembrou que, incluso cumpríndose o prazo inicial, “ao que se comprometeu Alfonso Rueda, a obra chegaría tarde”, xa que “a conversión completa deste corredor en autovía acumula máis dunha década de atrasos, o que demostra a falta de vontade política da Xunta coa provincia de Lugo”. “Estamos a falar dunha vía estratéxica para a mobilidade, a competitividade económica e a cohesión territorial. Non é só unha autovía: é unha infraestrutura crave para garantir a igualdade de oportunidades dos lucenses“, sinalou o rexedor.
O alcalde lamentou que “a lentitude coa que a Xunta está a executar os traballos resulta incomprensible” e lembrou que, nos últimos trece anos, o Goberno galego só puxo en servizo 11 quilómetros de autovía na provincia, concretamente no corredor Lugo-Sarria, “que a día de hoxe segue inacabado e sen data certa para a súa conclusión”. Para Fernández, os datos son “tan claros como preocupantes” xa que acumulan máis dunha década de atrasos e investimentos mínimos “que impiden avanzar nunha infraestrutura esencial”. Ademais, advertiu de que a dotación orzamentaria prevista pola Xunta “resulta claramente insuficiente para un proxecto que debería ser prioritario e avanzar a un ritmo moito maior”.
