O portavoz provincial popular, Antonio Ameijide, acusou aos representantes do BNG Antón Bao e Rubén Arroxo de “tentar rirse unha vez máis de todos os veciños da provincia de Lugo” ao pedir publicamente que o Goberno “se puxese a traballar para cambiar o illamento en materia de infraestruturas da provincia de Lugo”.

Así, o popular afirmou que foron eles os “cómplices necesarios” do Partido Socialista, tanto a nivel municipal, provincial e no Estado, “para que a provincia de Lugo chegase ao nivel de illamento no que nos atopamos”.

Ademais, Ameijide culpou aos nacionalistas de “amparar gobernos socialistas” tanto no Concello de Lugo, desde hai 26 anos, como nos últimos 18 na Deputación e o sete anos no Goberno central.

“En lugar de dar roldas de prensa reivindicativas teñen que ser reivindicativos en todas as administracións nas que teñen responsabilidades de goberno ou nas que asinan cheques en branco para manter a Pedro Sánchez na Moncloa o que, finalmente, condénannos a todos os lucenses”, afirmou.

Do mesmo xeito, lamentou que Lugo segue sendo a única provincia de Galicia e da contorna sen alta velocidade ferroviaria, “con estradas sen ningún tipo de mantemento”, lembrando que as autovías como a A-54 con Santiago, A-56 con Ourense, A-74 da Mariña ou a A-76 para unir Monforte con Ponferrada seguen sen finalizarse.

Tamén insistiu en que “ninguén no BNG está autorizado para esixir nada porque son corresponsables do illamento a todos os niveis”. “É indignante escoitar que pidan a ninguén que se poña as pilas despois de levar case 30 anos amparando todas e cada unha das decisións dos socialistas que levaron ao total illamento da provincia”, reiterou.

Nesta liña, culpou directamente a Rubén Arroxo, Efrén Castro e Néstor Rego de ser “absolutamente responsables da actual situación”, sen esquecer a Antón Bao, do que lembrou o seu papel como exconcejal e exvicepresidente provincial, “que tamén ten a súa responsabilidade porque nunca fixo nada por cambiar esta situación”.