O PP rexistrará novas mocións no Parlamento de Galicia e na Deputacion de Lugo para urxir “por enésima vez” ao Goberno central a reconstruír o viaduto do Castro, na autovía A-6, cunha data concreta para a súa “reapertura inminente”.
Así o avanza este sábado, en declaracións remitidas aos medios de comunicación, o coordinador de Territorio e Infraestruturas do PP galego, Antonio Meijide, quen lembra que “hai meses”, desde xuño de 2022, que está cortada esta estrada pola caída do viaduto.
“Desde o minuto cero, desde o Partido Popular de Galicia esiximos saber a data exacta da reapertura desta autovía, que é a única conexión da provincia de Lugo coa Meseta, co resto de España. Desde o Goberno de Pedro Sánchez seguen sen facer absolutamente nada“, lamenta Meijide.
De feito, lembra o accidente ocorrido este venres na N-6, tamén na zona do Castro, polo que a estrada habilitada como alternativa á A-6 quedou cortada ao tráfico. “Este venres vimos o risco e o perigo que provoca: un camión por pouco se precipita por un noiro por culpa desas malas condicións”, apunta o dirixente popular.
Neste contexto, o PPdeG levará tanto ao Parlamento autonómico como ao pleno da Deputación senllas iniciativas para que se repoña o viaduto da autovía nos dous sentidos ao mesmo tempo.
O ACCIDENTE “VÍASE VIR”
Sobre esta cuestión tamén se pronunciou este sábado a conselleira de Infraestruturas e Mobilidade da Xunta, Ethel Vázquez, quen dixo que o accidente do venres na N-6 “era algo que se vía vir” e “cuestión de tempo” que ocorrese. “Afortunadamente, non houbo vítimas”, engadiu.
