A alcaldesa de Lugo, Lara Méndez, afirmou este luns que o goberno local está “a tomar medidas” para solucionar os problemas en materia de persoal do Concello, máis perentorios na área de urbanismo. Unhas declaracións que se producían despois de que o grupo municipal do PP solicitase unha “auditoría interna” que trate de dirimir o porqué dos atrasos na concesión de licenzas.

Méndez recoñeceu que a área de urbanismo é unha das áreas con problemas derivados dese déficit de persoal, que atribuíu a decisións dos gobernos en Madrid do PP de Mariano Rajoy.  Para tratar de resolver esas carencias, lembrou a aprobación da Relación de Postos de Traballo (RPT) finalizándose a “de 2015, 2016, 2017, 2018 e 2020”. A de 2019 non se puido executar ao non contarse con orzamentos.

Tamén apelou á creación de “bolsas de emprego”. Lembrou como antes “se tardaba en cubrir unha baixa dous ou tres meses porque tiñamos que facer un proceso selectivo”. “Agora co sistema de bolsas, que en breve estará concluído, xa poderemos facer uso deles dun día para outro e teremos un substituto dun día para outro”, remarcou.

“LEVAMOS SEIS ANOS TRABALLANDO”

Lara Méndez destacou que leva “seis anos traballando” pondo en marcha esa Relación de Postos de Traballo “a pesar das limitacións, porque antes a taxa de reposición estaba nun 50 por cento e agora está no 75 por cento”.

“Ao escoitar isto ao PP, póñenselle a unha os pelos de punta porque a súa irresponsabilidade chega a uns extremos de desvergoña total e absoluta. Cando hai que pór solucións é cando se está gobernando. Se cando se goberna o único é pór trabas para dar solución aos problemas, pois na oposición benvidos sexan que son máis útiles porque polo menos defenden o que defendemos nós cando gobernamos, que é dar solución aos problemas existentes e non crealos”, concluíu.