O PP local de Lugo apuntou este luns a unha suposta “renuncia” do xefe de Servizos Sociais do Concello por “diferenzas” coa concelleira desta área, Olga Racamonde. Con todo, o goberno municipal explicou posteriormente que non se trata de “ningunha dimisión”, senón que era un posto “delimitado temporalmente” por seis meses.
Primeiramente, os populares emitiron un comunicado no que se din “preocupados pola desbandada de cargos” no goberno bipartito PSOE-BNG, liderado pola socialista Lara Méndez. “Primeiro foi o concelleiro de Urbanismo (Miguel Couto) quen dimitiu por desencontros coa alcaldesa e agora vén de coñecerse a renuncia do xefe de Servizos Sociais por diferenzas coa concelleira responsable desta área”, asegurou a edila do PP Macamen López Silva.
Segundo asegurou, o xefe de Servizos Sociais “tan só levaba no cargo desde outubro de 2020” e era “o terceiro” en dous anos “que renuncia a asumir esta tarefa”. Ademais, a concelleira popular lembrou as “moitas baixas” producidas nesta área durante a pandemia e vinculounas á “falta de diálogo e ás continuas desavinzas de Racamonde co persoal de servizo”, o que provoca “problemas de operatividade” neste departamento.
O CONCELLO DESMÉNTEO
No entanto, posteriormente, o goberno local emitiu un comunicado no que aclarou que “non foi presentada ningunha dimisión” en Servizos Sociais, senón que a persoa que desempeñaba este cargo ocupábao “en Comisión de Servizo por unha duración de seis meses” que conclúen este mesmo xoves, 15 de abril
Así, engade o goberno, era un posto “delimitado temporalmente” no momento do seu nomeamento e “segundo o procedemento que levou a cabo”. Agora, o Concello prevé convocalo de novo “de modo inmediato” para proceder á súa cobertura.
