O goberno provincial da Deputación de Lugo, conformado por socialistas e nacionalistas, sacou adiante este luns os orzamentos para o próximo ano, que ascenden a máis de 92,5 millóns, así como a disolución de Suplusa. As contas contaron co rexeitamento do PP.
Antes do pleno extraordinario, o presidente da Deputación, José Tomé, destacou que este luns “é un gran día para a provincia, xa que se van a tomar “dous acordos fundamentais para esta casa”.
Sobre Suplusa, foco de desencontros cando a presidía o alcalde de Becerreá Manuel Martínez, dixo Tomé que se vai á súa disolución porque lonxe de ser “útil” para a deputación “xogaba en contra e metía goles en propia porta”. “Iso é algo que non se pode permitir, e por tanto é un chiringuito que desaparece e a deputación, como tal, farase cargo das competencias que era a de zonas verdes e polígonos industriais“, sostivo.
ORZAMENTOS 2021
Dos orzamentos, que consignará máis de 21 millóns de euros para o Plan Único para os concellos, Tomé asegurou que se trata dunhas “contas sociais, que responden os catro alicerces básicos do goberno; atención ás persoas, mobilidade, atención ao medio rural e atención ao turismo e o comercio”. “Non deixamos nada que non responda os intereses da provincia de Lugo”, presumiu sobre os orzamentos.
Pola súa banda, os populares, a través do seu portavoz o ex alcalde de Foz, Javier Castiñeira, xustificaron o seu voto en contra tanto das contas como da disolución de Suplusa. Así, en canto á sociedade do chan reiterou que a súa formación pide que “se convoque unha mesa de negociación para os tres puntos” que separan á oposición e ao goberno provincial e que, segundo apuntou, “pasan porque o persoal sexa subrogado á deputación e non a TRAGSA, que se aclare quen determinou ceder a maquinaria a TRAGSA e que se cumpran con todos os convenios cos concellos”.
Dos orzamentos, deixou claro que están “moi separados” das expectativas do PP, apelando a que “o ano 2021 ten que ser fundamental para saír da crise”. “E debemos saír co tecido económico fortalecido e estes orzamentos non o fortalecen”, manifestou . “Conxélase o Plan Único e redúcense os investimentos case tres millóns de euros. Son uns orzamentos malos para Lugo“, afeou finalmente.
