A concelleira de Gobernación do Concello de Lugo, Paula Alvarellos, anunciou, tras a Xunta de Goberno Local, que se decidiu apartar do cargo á xefa de persoal por “cumprimento inadecuado das súas funcións”.
Alvarellos precisou que o cesamento, que se comunicará este mércores, está motivado “por varios informes de intervención, do secretario e do órgano asesor da Xunta de Goberno Local nos que se sostén, que a xestión en materia de persoal foi inexistente ou aínda peor desenvolvida de forma desatinada, aleatoria e moitas veces inxustificada”.
Estes informes foron elaborados tras “detectarse mala praxe na xestión de persoal sen que se puidese verificar cos expedientes presentados pola xefatura dese servizo que se axustaban á realidade, creando incertezas xurídicas non só inapropiadas senón que podían situar o Concello ante feitos de difícil resposta”, explicou.
Unha vez avaliada “toda a información nas conclusións finais dos informes, tanto de intervención, como do secretario, como do órgano asesor da Xunta de Goberno, destácanse cambios frecuentes de criterios inxustificados, informes inconclusos ou confusos e mesmo expedientes dos que non se ten constancia da súa fiscalización”, concretou Alvarellos, sobre esta funcionaria, que entrou en 1996 baixo o goberno do popular Joaquín María García Díez, e á que agora se separa da xefatura de persoal e que dispón de dez días para presentar alegacións.
Alvarellos, que é avogada de profesión, manifestou que, de momento, “non se advertiu a existencia dun delito aínda que se se confirma no devir da investigación (por parte do Concello) actuaríase”.
PROXECTOS
Pola súa banda, o primeiro tenente de alcalde, o nacionalista Rubén Arroxo, anunciou a adxudicación “de dous proxectos que ían incluídos no suplemento de crédito (que se pediu en setembro)”. “Por unha banda o plan de sinalización horizontal, que vai dividido en catro lotes, cun custo total de 1.087.904 euros e un prazo de execución de catro meses”, sinalou.
A outra “actuación”, engadiu, versa sobre “a ampliación do cemiterio de San Froilán, que ten un custo de 442.152 euros e tamén ten un prazo de execución, unha vez adxudicada, de seis meses”.
