A asociación cultural Rente ao Couce desvelou hoxe o nome da persoa merecedora do Foucín de Honra neste 2020, que non é outra ca Laura Pardeiro, a creadora do proxecto ‘Leiras e Marcos’. O acto de entrega será o vindeiro 12 de decembro en Becerreá, data e lugar onde se celebrará a Feira do 12.

Rente ao Couce recoñece así o labor desta moza das Nogais “que nos achega unha visión máis cercana, acertada e de futuro” sobre a comarca dos Ancares, afastada dunha mirada de “idealización”, “incomprensión” ou “absoluto esquecemento”. Faino a través das súas redes sociais e da súa revista dixital, da que Laura Pardeiro xa ten falado no Lugo Xornal algo antes de dar a coñecer que era ela quen estaba detrás do proxecto.

“Por ser muller, do rural, xove e por espallar unha visión de futuro, orgullo e amor polo noso”, Laura Pardeiro ha levar para a casa o segundo Foucín da asociación.

O ANTERIOR HOMENAXEADO

O primeiro entregáronllo o ano pasado a Alfonso Becerra como distinción ao seu labor asociativo á fronte do colectivo A Pipa.