A sala segunda do Tribunal do Contencioso Administrativo de Lugo desestimou o recurso presentado pola compañía mineira Erimsa contra a anulación do permiso para unha explotación de cuarzo en varios municipios da Terra Chá.
O fallo do tribunal lugués, contra o que cabe recurso de anulación, desestima integramente o recurso da empresa á denegación do Concello da Pastoriza do permiso para explotar o proxecto ‘Alicia 5917’, que ademais de neste municipio tamén se estendía aos veciños de Abadín, Castro de Rei, A Pastoriza e Vilalba.
Deste xeito, a maxistrada lembra na súa sentenza que a Lei Reguladora de Bases de Réxime Local outorga ás administracións municipais as competencias en materia de medio ambiente e, por tanto, entra dentro dos poderes dos municipios controlar a vixencia dunha Declaración de Impacto Ambiental.
COMPETENCIAS LOCAIS
E é que a anulación do permiso de explotación ditada polo goberno local da Pastoriza asentouse na consideración de que a Declaración de Impacto Ambiental ( DIA) do proxecto ‘Alicia 5917’ estaba caducada, pois o documento fora elaborado no ano 2005.
Neste sentido, a xuíza considera que o concello obrou “en exercicio da súa potestade” á hora de determinar a vixencia da DIA e lembra que sería diferente no caso de que se encargase de outogarla, debido a que, esa si, non é unha competencia da administración local.
Ademais, a maxistrada sinala que a xurisprudencia apunta que a prolongación ‘sine die’ dunha Declaración de Impacto Ambiental “podería prexudicar” a protección do medio ambiental, polo que considera “facilmente entendible” que a lexislación sectorial “vaia modificándose, xeralmente aumentando os estándares de protección, sendo natural que o que vale nun momento dado non o sexa nun posterior”.
“A DIA non pode petrificar os seus efectos no tempo nin tampouco pode tratar de aplicarse a un proxecto distinto ao que está indisolublemente unida”, sentencia a xuíza María de los Ángeles Braña no fallo.
