A cidade de Lugo acolleu este sábado o 48º Congreso da Asociación de Viúvas de Galicia, unha cita que reuniu participantes de toda a comunidade e na que se puxo de relevo o traballo desenvolvido por estas mulleres nas últimas décadas. A conselleira de Política Social e Igualdade, Fabiola García, asistiu ao encontro para recoñecer publicamente o seu labor, que definiu como “referente” no ámbito do asociacionismo feminino e do envellecemento activo.

“Xuntas aprendestes a reconstruírvos, a acompañarvos e a volver gozar da vida”, expresou a conselleira no seu discurso, sinalando o valor colectivo da asociación como espazo de apoio emocional e de reivindicación de dereitos. Fabiola García salientou que moitas das integrantes sufriron durante anos un esforzo invisibilizado, e que a entidade supón un exemplo para outras mulleres que afrontan a viudez.

RECOÑECEMENTO Á TRAXECTORIA DA ASOCIACIÓN LUCENSE

Durante o acto tamén se conmemorou o 50 aniversario da Asociación de Viúvas de Lugo, unha das máis antigas da comunidade. A súa fundación debeuse ao impulso de Aurora Carro, destacada por García como unha muller que “rompeu moldes” e desafiou os prexuízos asociados á viudez, loitando abertamente por igualdade de oportunidades nun contexto marcado polo silencio e o tabú.

A conselleira reafirmou o apoio da Xunta de Galicia ás iniciativas que promovan a participación activa das mulleres maiores e destacou a importancia de seguir tecendo redes que fomenten a autonomía, a socialización e o acceso a recursos para afrontar esta etapa da vida con dignidade.

O congreso converteuse así nun espazo para compartir experiencias e reafirmar o compromiso dun colectivo que leva décadas reclamando o seu lugar na sociedade, visibilizando un tipo de loita feminista a miúdo esquecida: a das mulleres que, tras perder a parella, apostaron por seguir adiante e facelo xuntas.