InicioLugo e contornaLugoA alcaldesa de Lugo cualifica de "obxectivo irrenunciable" o estudo de viabilidade...

A alcaldesa de Lugo cualifica de “obxectivo irrenunciable” o estudo de viabilidade da conexión ferroviaria con Santiago

"Imos seguir avanzando neste obxectivo irrenunciable. Neste sentido, realizaremos un seguimento deste asunto e das súas distintas fases para alcanzar esta necesaria conexión co Eixo Atlántico", subliñou Paula Alvarellos

PUBLICADA O

- Advertisement -

A alcaldesa de Lugo, Paula Alvarellos, saudou o anuncio dun estudo de viabilidade para a conexión ferroviaria directa entre a capital luguesa e Santiago, que a rexedora socialista cualifica como un “obxectivo irrenunciable”.

Este luns, no que se coñeceu a licitación da análise sobre unha nova variante entre a liña León-A Coruña e o Eixo Atlántico de Alta Velocidade, a alcaldesa valorou o paso dado polo Ministerio de Transportes que, como lembrou, foi avanzado polo ministro Óscar Ponte durante unha visita a Lugo a mediados de xuño.

En declaracións difundidas aos medios, Alvarellos incidiu en que a licitación do estudo de viabilidade “é unha constatación do compromiso adquirido con e as luguesas”, supón “un avance no futuro” da cidade, ademais de reividicarlo como froito do “traballo activo” do goberno local “para esixir a necesaria mellora das comunidades en Lugo”.

“Imos seguir avanzando neste obxectivo irrenunciable. Neste sentido, realizaremos un seguimento deste asunto e das súas distintas fases para alcanzar esta necesaria conexión co Eixo Atlántico”, subliñou Alvarellos.

CONTRATO

A redacción do estudo, que saíu a concurso por un importe de 423.500 euros e que persegue, segundo o Ministerio, o obxectivo de definir un novo trazado capaz de “renovar e modernizar” a conexión ferroviaria entre Lugo, a capital de Galicia e as principais cidades da cornixa atlántica, constará de dúas fases.

A primeira estará centrada en analizar a mobilidade no ámbito da capital lucense para poder avaliar os fluxos de viaxeiros, determinar as necesidades da poboación e establecer o nivel de demanda de novos servizos de transporte na cidade amurallada e a súa contorna de influencia.

Durante a segunda traballarase directamente na caracterización do trazado a través dunha nova variante entre a liña León-A Coruña e o Eixo Atlántico de Alta Velocidade á vez que se procederá a avaliar os traballos de acondicionamento necesarios na liña ferroviaria xa existente.

Finalmente, precisou o Ministerio, analizarase a conveniencia das alternativas propostas en base a “un estudo de rendibilidade socieconómica” que tomará en consideración “a demanda e os tempos de viaxe previstos”.

O estudo de viabilidade, que vén dar resposta a unha demanda antiga da cidadanía lucense, encádrase dentro das actuacións previstas desde o Ministerio de Transportes para modernizar a rede ferroviaria galega mellorando algúns “trazados centenarios” que impedían, indicaron, o desenvolvemento de “conexións eficaces” e que se traducían nunha “baixa competitividade” do ferrocarril en relación a outros medios de transporte.

PSOE E BNG CELEBRAN O ANUNCIO

As reaccións ante o anuncio da licitación do estudo de viabilidade ferroviaria entre Lugo e Santiago non se fixeron esperar. O presidente da Deputación Provincial de Lugo, o socialista José Tomé, cualificou a noticia como unha mostra do “compromiso firme” do Goberno de España coa “modernización das comunicacións en Galicia” e como unha “aposta por mellorar a conectividade de Lugo” coas demais cidades do eixo atlántico.

“Este estudo supón un salto cualitativo nas infraestruturas ferroviarias”, subliñou Tomé, para quen conectar a capital lucense coas principais cidades da cornixa atlántica antóllase unha “ferramenta clave”, asegurou, para “mellorar as comunicacións, facilitar a mobilidade sustentable e impulsar o desenvolvemento económico, turístico e social” da provincia de Lugo.

Igualmente satisfeito co “avance” pero máis crítico coa xestión do Executivo central en materia ferroviaria mostrouse, pola súa banda, o portavoz do BNG en Lugo, Rubén Arroxo, que definiu como unha “boa noticia” o estudo de viabilidade anunciado, pero que alertou do “importante atraso” no que segue sumida ao seu xuízo a provincia en materia de conexións por ferrocarril.

“Pedimos que xunto coas melloras nas infraestruturas se retome o servizo das liñas eliminadas nos últimos anos”, manifestou o tamén tenente de alcaldesa do Concello de Lugo, que instou ao Goberno central a “planificar mellor os investimentos ferroviarios” na provincia. “Lugo segue sufrindo unha histórica discriminación en canto investimentos que se traducen nun déficit en infraestruturas”, finalizou.

Pola súa banda, a Xunta “congratúlase” pola licitación do estudo de viabilidade para a conexión por tren entre Santiago e Lugo, pero móstrase “escéptica” coa súa materialización debido ás “demoras e incumprimentos” do Goberno central non só co transporte ferroviario, senón tamén con outras infraestruturas en Galicia.

ÚLTIMAS

Piden 15 meses de prisión para un home que humillou a un camareiro en Lugo por ser estranxeiro e pola súa orientación sexual

A Fiscalía pide 15 meses de prisión e multas por 3.600 euros para un...

O Goberno de Lugo apoia a proposta de que a ponte sobre o Miño da N-540 reciba o nome de Tomás Notario Vacas

O goberno local de Lugo aceptou a proposta do Colexio de Enxeñeiros de Camiños, Canles e Portos para...

Choca contra un coche aparcado e ten que ser excarcerada

Os bombeiros tiveron que excarcerar este venres a unha condutora que resultou ferida ao...

Identificado un condutor que circulaba a 220 km/h nunha estrada de 100 km/h tras subir un vídeo

A Garda Civil investiga a un condutor que circulaba a 220 quilómetros por hora nunha estrada limitada...