O turismo creceu na cidade de Lugo, cun mes de xullo que superou os datos do ano pasado, segundo informa a concelleira da área, Maite Ferreiro.
Así, as distintas instalacións turísticas municipais recibiron o pasado mes a 19.374 persoas, case mil máis que en xullo de 2023. “Algunhas duplicaron o número de visitantes”, apunta tamén.
En concreto, a Oficina Municipal de Turismo da praza do Campo atendeu en total a 5.813 turistas durante xullo, mentres que o posto de información turística da praza Maior recibiu 6.225 visitantes.
A edil tamén destacou as visitas a centros museísticos e “o aumento de persoas que se achegan á cidade froito da campaña Lugo Km 100, que está a situar ao noso concello como un referente do turismo de calidade e proximidade”.
