Axentes da Policía Local de Lugo interceptaron na madrugada deste xoves a un condutor que circulaba de forma temeraria, con taxa de alcoholemia superior á permitida e cuxo vehículo non pasara a Inspección Técnica obrigatoria.

Segundo informaron fontes policiais, un operativo nocturno do 092 detectou o coche circulando en zigzag pola rúa Yáñez Rebolo, e observou que o condutor presentaba signos de embriaguez. Tras darlle o alto, realizáronlle un test de alcoholemia, que arroxou un resultado positivo de 0,83 mg/l.

Por estes feitos, o condutor foi denunciado por un delito contra a seguridade viaria e o seu coche inmobilizado. Ademais, os axentes comprobaron que non levara o vehículo a pasar a ITV, e que os pneumáticos xa non tiñan debuxo nas ranuras das bandas de rodaxe, polo que tamén foi denunciado por estas infraccións.

Dáse a circunstancia de que este mesmo vehículo fora denunciado horas antes nun control na rolda da Carmen, nesa ocasión por exceder a velocidade permitida. Esta infracción supón multa de 300 euros e retirada de dous puntos de carné.

FALSIDADE DOCUMENTAL

Por outra banda, a Policía Local de Lugo tamén informou dunha intervención na noite do mércores, na que se detectou un coche na rúa Monte Picato que tiña a ITV caducada desde había un ano.

Con todo, o vehículo tiña no parabrisas un adhesivo de cor verde, simulando ser de ITV Galicia, con validez ata febreiro de 2022. Ao ser preguntado por isto, o propietario do coche asegurou que o comprou hai pouco e que descoñece por que existe esa discordancia entre a documentación do vehículo e o adhesivo.

Os axentes interviñeron o adhesivo e instruíron dilixencias por un presunto delito de falsidade documental, así como denuncia por circular sen pasar a inspección obrigatoria.