A alcaldesa de Lugo, Lara Méndez, e o conselleiro delegado do fondo de capital risco Torsa Capital, Jesús Torres, subscribiron este venres no Concello o convenio para impulsar a “estratexia” de “Lugo Transforma”, co que se pretenden mobilizar ata doce millóns de euros.
Trátase dun fondo público “emprendedor” que ten como fin a captación de novos investimentos para a cidade amurallada, atraer empresas e crear emprego “sustentable”. Dita “estratexia” cimentarase a través da entrada temporal do Concello no capital de proxectos innovadores da modalidade de fondo de capital risco.
A alcaldesa, Lara Méndez, felicitouse e deu a “benvida” a esta iniciativa ao asegurar que trata de “un día importante para o Concello de Lugo”. Méndez sinalou que este proxecto profundará nunha “transformación importante” da cidade, que se “iniciou na anterior lexislatura”, lembraba.
Na súa intervención, a rexedora lembrou que no anterior mandato “tamén se iniciou unha importante transformación económica, a través de distintos proxectos e estratexias que veñen desenvolvendo con fondos europeos”.
Con todo, sostivo que “a chegada do Covid” fixo “reformular todo”. “E estivemos a estudar como manter os pequenos negocios, Pemes, e aos autónomos da cidade, con moitas iniciativas e tamén quixemos ser ambiciosos e quixemos ir un paso máis aló, para ver como aproveitar as oportunidades que se puidesen xerar e poder ir á recuperación do emprego que se poida perder”, sostivo.
REACTIVAR A ECONOMÍA
“Nesa liña foi como naceu o Lugo Transforma, con este fondo de capital risco e fondo de investimento onde o Concello de Lugo é pioneiro en Galicia e onde queremos reactivar a economía, porque xa non se trata só de transformar senón de reactivar a economía utilizando tamén a sustentabilidade”, destacou.
Un plan deseñado para dez anos, co fin de captar investidores e dar a coñecer as empresas da cidade fose do marco municipal, e que se estrutura en tres fases.
Pola súa banda, o conselleiro delegado de Torsa Capital, Jesús Torres, marcouse como obxectivo que dito fondo “chegue a 50 empresas, no próximos dez anos”, e a través desta “estratexia” perséguese “crear mil postos de traballo directos” que se multiplicarían “por dous ou por tres no caso de empregos indirectos.
