A Policía Local de Lugo desaloxou a unha peregrina alemá que acampara no cemiterio de San Lázaro para pasar a noite mentres realiza o Camiño de Santiago. O párroco da igrexa de San Lázaro foi o que deu a voz de alerta na mañá do pasado sábado, 2 de outubro, pola presenza dunha tenda de campaña no camposanto.
No lugar personouse a Policía de Barrio da Policía Local de Lugo. Alí, comprobouse que a muller era unha camiñante, que foi identificada e requirida para que abandonase o lugar, cuestión que fixo “ao momento”, segundo explican os axentes. A muller instalara a súa tenda de campaña pegada ás tumbas.
Precisamente, os veciños do barrio reuniron diñeiro recentemente para realizar arranxos no cemiterio ante as zonas danadas existentes. A igrexa de San Lázaro e o cemiterio atópanse no lucense barrio da Ponte, nunha contorna no que estaba situado un antigo lazareto.
