A plataforma sanitaria ‘Salvemos o Hospital da Costa‘ denunciou que “un gran número” de mulleres da comarca da Mariña están a ser derivadas ao Hospital Lucus Augusti (HULA) da capital luguesa para a realización de probas complementarias como ecografías cando as mamografías do cribado de cancro de mama “resultan dubidosas ou sospeitosas”.
Nun comunicado, a plataforma asegura que, ata o momento, este tipo de probas complementarias se realizaban no Hospital da Mariña, polo que consideran o feito de que se derive a pacientes a Lugo “outra agresión máis á sanidade pública da comarca e ás mulleres mariñás“.
A coodinadora do colectivo, Montse Porteiro, sostén que o servizo de radioloxía do hospital comarcal de Mariña “leva moito tempo a medio gas” xa que, di, están pendentes de cobertura dúas prazas de radioloxía.
Porteiro relaciona esta situación, á que engade o “traslado de facto doutra facultativa”, coa “nefasta decisión de trasladar ao HULA a realización destas probas complementarias, que multiplican o grao de sufrimento e medo das mulleres que necesitan confirmar se padecen un cancro ou non”.
