O presidente da Deputación de Lugo, José Tomei Roca, inaugurou este martes as xornadas Gobernos Locais e Servizos Sociais, organizadas pola Deputación de Lugo en colaboración coa Fundación Democracia e Goberno Local e nas que participaron medio centenar de traballadores e representantes institucionais de entidades locais de toda España.
No encontro, celebrado de maneira telemática, o presidente provincial asegurou ser un “firme defensor do público e do municipalismo” e considerou que o ocorrido durante a pandemia no campo social debe facer “reflexionar a todos” sobre a necesidade de “un novo modelo de servizos sociais”, así como un novo marco de financiamento local.
A incidencia da crise da covid-19, a fórmula de xestión concertada, o reto demográfico e o coidado dos maiores foron os temas que vertebraron a xornada virtual, na que tomaron parte como relatores expertos das universidades de Xirona, Barcelona, Santiago de Compostela, A Coruña e da Autónoma de Madrid.
Durante a súa intervención, José Tomei subliñou que garantir o pleno acceso a unha carteira de servizos públicos de calidade no conxunto do territorio “supón cumprir co principio de igualdade que consagra a Constitución e é a ferramenta máis eficaz para frear a perda de poboación no rural”.
A pandemia, engadiu, supuxo “unha proba de tensión para os servizos sociais”, aumentando o gasto no conxunto dos concellos galegos en 6 millóns de euros mensuais, segundo a Federación Galega de Municipios e Provincias (FEGAMP), sen que as entidades locais recibisen “nin un só euro de fondos adicionais para a loita contra a crise sanitaria”.
“Unha crise social, económica e sanitaria, que debería servir para revisar as necesidades das facendas locais, historicamente infradotadas, só serviu para cargalas con novas competencias impropias, como ocorreu coa desinfección dos colexios, que a comunidade autónoma de Galicia pasou aos concellos co argumento de que eran equiparables ás tarefas de limpeza e mantemento habituais”, dixo o presidente.
MODELO ASISTENCIAL AUTONÓMICO
Así mesmo, a covid-19 “puxo en cuestión da maneira máis triste posible o modelo asistencial das residencias, os cocientes de persoal por residente, os controis periódicos das residencias concertadas e mesmo o propio deseño arquitectónico dos centros”.
Por iso, o mandatario provincial apelou a un novo modelo de servizos sociais. Neste sentido, destacou que a Deputación de Lugo dedica un terzo do orzamento anual, uns 30 millóns, a políticas sociais “que debería asumir a comunidade autónoma”, e puxo en valor o modelo de residencias provincial.
“Residencias públicas de pequeno tamaño, de entre 30 e 40 usuarios de media, asentadas en pequenos municipios, de modo que as persoas viven esta nova etapa preto das súas familias e amigos, na contorna no que pasaron toda a súa vida”, explicou José Tomei.
RUTAS EN CATAMARÁN
Por outra banda, máis de 430 persoas realizaron algunha das dúas rutas fluviais en catamarán que ofertou a Deputación de Lugo na Ribeira Sacra durante a ponte Letras Galegas.
A Deputada de Réxime Interior, Promoción do Territorio e Turismo, Pilar García, foi a encargada de informar destes datos, que cualificou como “moi positivos, tendo en conta a situación sanitaria que limita os aforamentos das embarcacións á metade”. “Ademais, as reservas indican que a tendencia da tempada vai ser moi boa”, engadiu.
García Porto tamén adiantou que na actualidade hai unhas 1.700 reservas para toda a tempada, que se prolongará ata o mes de decembro. “Desde o comezo das viaxes estamos a percibir un cambio de comportamento no público, que agora fai plans a curto prazo e decide con menos antelación que facer no seu tempo de lecer, incrementando a reservas nos catamaráns nos días previos a facer a viaxe”, destacou.
