Un home veciño de Lugo, de 36 anos, está a ser investigado por un delito contra a seguridade vial tras detectar a Garda Civil que este circulaba a 163 quilómetros por hora por un tramo limitado a 70. Foi na estrada LU-546 (Nadela – Monforte), dentro do termo municipal de Lugo.
Os feitos ocorreron pasadas as 9 da mañá do pasado 30 de maio, cando un cinemómetro da Garda Civil captou un vehículo que ía dirección Nadela a máis do dobre da velocidade permitida. Daquela, a patrulla e outros efectivos da Garda Civil iniciaron un seguimento do turismo.
Foi localizado, finalmente, no polígono industrial do Ceao e foi identificado polos axentes. Ao constituír os feitos unha infracción penal, solicitouse a presenza do Equipo de Atestados do Subsector de Tráfico e instruíronse as correspondentes dilixencias policiais. Os feitos foron remitidos ao Xulgado de Instrución de Garda de Lugo.
