EFE | O colectivo Lugo Monumental, que agrupa os negocios do centro da cidade, denunciou o “engano” que aos seus ollos supón o Plan Reanima do Concello de Lugo, “unha campaña máis”. Aseguran que, se ben o Concello se comprometera a cubrir o 30% da base reguladora do salario dos traballadores sometidos a un ERTE, serán as empresas as que realmente terán que asumir o groso destes gastos.
O presidente de Lugo Monumental, Luís Latorre, lembrou que a asociación “apoiou decidida e publicamente ao Concello desde o primeiro momento” cando “anunciou que achegaría unha partida económica de 5 millóns de euros” para impulsar o Plan Reanima, entre cuxas medidas se atopaba o abono dese 30% da base reguladora que non cobre a prestación por desemprego dos traballadores afectados por un ERTE.
“Con todo, vémonos obrigados a denunciar que a realidade é ben distinta”, dixo Latorre, algo así como “un ‘eu convido, ti pagas’ “. Segundo Latorre, “a concreción do plan fai que sexan as empresas as que realmente asuman o groso deses custos a cambio dunha pequena axuda municipal que de ningunha maneira cumpre co prometido”.
Nese sentido, precisou que “ao tratarse dunha axuda dun único pago, a situación será cada vez máis gravosa, xa que cada mes a empresa” verase obrigada a “completar” con fondos propios “a base reguladora”. “A empresa adquire o compromiso de completar o 100% da base reguladora, pero en ningún caso se ve compensada polas axudas municipais”, dixo Latorre, que “nin sequera cobren a primeira mensualidade”, de modo que a situación pode ser “moi prexudicial en función da duración do estado de alarma”.
CRÍTICAS DENDE O PRINCIPIO
Aínda que recoñece que “toda axuda é benvida neste grave momento, non é aceptable que se anuncie unha subvención aos traballadores que, finalmente, terán que soportar maioritariamente as empresas”.
“Non pensedes que facemos esta crítica agora. Todo o contrario. Avisamos previa e reiteradamente” sobre os “defectos” que observaban no plan de axudas. “Esperamos a que se celebrase o pleno de aprobación do crédito coa vana esperanza de que recapacitasen e anunciasen unha corrección, pero á vista de que non foi así, non nos queda máis remedio qe denunciar publicamente que as axudas para os traballadores do plan Reanima son un “engano, unha campaña máis”, conclúen.
