EFE.- Axentes do Corpo Nacional de Policía detiveron un segundo home implicado na suposta violación que se produciu esta fin de semana nun domicilio particular da zona da Fervedoira, na cidade de Lugo.
Por mor da denuncia presentada pola presunta vítima, os axentes xa detiveran o pasado sábado a un home duns 50 anos. Na mañá deste luns produciuse o segundo dos arrestos, tal como informaron a Efe fontes policiais.
A investigación policial “foi avanzando” e das probas solicitadas e dos testemuños recollidos nas últimas horas despréndese a posible participación nos feitos do home arrestado esta mañá, dunha idade ao redor dos 40 anos, que compartía domicilio co primeiro detido.
Da investigación fíxose cargo o Xulgado de Instrución número 3 de Lugo, especializado en casos de violencia de xénero, que decretou o secreto de sumario. Está previsto que ambos detidos pasen na tarde deste luns ao dispor da autoridade xudicial.
