A nova empresa adxudicataria do centro de día Novo Antonio Gandoy, OHL Servicios Ingesan Sapor, comezou onte a prestación do servizo. Segundo o Concello de Lugo, e ao contrario do que denunciaba no día de onte o PP, non se deu ningún tipo de incidencias
Este mesmo 3 de xaneiro, a alcaldesa de Lugo, Lara Méndez, e a concelleira de Benestar Social, Olga López Racamonde, achegáronse ata as instalacións para coñecer de primeira man como foron os dous primeiros días de servizo. Segundo comentou a concelleira, a empresa cumpriu con todos os requisitos esixidos, ao igual que co servizo de transporte. Os vehículos adaptados chegaron hoxe, pero onte os usuarios e usuarias puideron facer uso dun eurotaxi que puxo á súa disposición a empresa. “A adxudicataria mandoulles unha carta con tempo suficiente para avisarlles desta alternativa para onte”, aclarou a edil.
DESMINTEN CRÍTICAS DO PP
Con estas palabras, desminten as críticas vertidas onte polo grupo municipal do PP, cuxo voceiro sinalaba os supostos “incumprimentos” de contrato cos que iniciaba o ano a empresa adxudicataria. Entre outras, indicaban a falta de transporte para os beneficiarios do centro ou a falta de uniformes e material informático.
A edil socialista afeoulles que “fagan denuncias sen antes estar informados”, porque “lonxe de desenvolver con criterio o seu traballo de fiscalización, o único que fan con mentiras é crear malestar e preocupación entre os usuarios”.
AS NOVIDADES PARA O CENTRO DE DÍA
En canto ás melloras incluídas no contrato con esta empresa, atópase a oferta dun vehículo adaptado máis, así como o aumento de actividades para os usuarios.
A empresa atende os módulos de prestacións sociais, de atención xeriátrica-rehabilitadora e de atención á saúde psicofísica e dietética, ademais do aseo e o coidado persoal diario dos usuarios e usuarias. O servizo inclúe, tamén, o apoio necesario para a mobilización das persoas usuarias a fin de manter un nivel de funcionalidade e de interacción social adecuado, á parte do desenvolvemento de actividades de ocio, culturais e creativas e as vinculadas coa socialización e participación.
