Membros das Mancomunidades Veciñais de Montes de Anafreita e de Negradas asinaron coa Deputación un acordo para acondicionar a Cova da Serpe. Este atractivo turístico, de carácter lendario, atópase no límite entre os concellos de Friol e Guitiriz, próximo á etapa Miraz-Sobrado do Camiño do Norte. O goberno provincial instalará sinalización, paneis informativos, un área recreativa e un miradoiro.
A Cova da Serpe, fogar de antigas lendas e senlleiro enclave natural, recibe cinco mil visitantes anuais. O interese que esperta está vencellado á proximidade doutros bens históricos, coma a Torre de Friol, do século XIII, ou a Fortaleza de San Paio de Narla, cen anos posterior, con importantes coleccións de etnografía incluídas na Rede Museística provincial.
Melloras na Cova da Serpe
Durante este mes, a contorna da cavidade recibirá melloras para facilitar a visita e o desfrute do lugar, visitado por centos de grupos de sendeirismo e afeccionados da bicicleta, ademais dos peregrinos e xentes das comarcas de Negradas e Anafreita. O miradoiro será o novo reclamo da Cova da Serpe, permitindo contemplar panorámicas da provincia, divisando incluso a capital e Os Ancares na distancia.
Así, crearase unha área recreativa con bancos, mesas e unha fonte; sinalizarase axeitadamente o camiño á Cova da Serpe, con frechas e indicacións; e instalaranse paneis informativos para dar conta do valor patrimonial da caverna. O monte acada 840 metros de altitude na Dorsal Galega, delimitando as provincias de Lugo e A Coruña.
A Cova da Serpe é un lugar máxico. Existe a lenda de que a filla do señor da Fortaleza de San Paio ocultouse nela co seu namorado, escapando do pai pola negativa deste á relación. Segundo o relato popular, na cova vivía unha monstruosa serpe que mordeu ao home cando tentaba acabar con ela. Rescatada, a moza pechouse no castelo, sumida nunha profunda tristeza pola perda do seu namorado.
