A repartición dos pasquíns que anunciaban citas con “tarotista e vidente” motivou o informe sobre a xuíza titular de Vixilancia Penal número 3. Así o confirmou a Europa Press o presidente da Audiencia Provincial de Lugo, José Antonio Varela Agrela. Dende esta institución alertouse ao Tribunal Superior de Xustiza de Galicia logo de coñecer “por múltiples vías” o reparto de publicidade por parta da suposta xuíza vidente.

Coma xa fixera o xoves, El Progreso publicou este venres a descrición dunha sesión de tarot coa xuíza. Con todo, despois de transcender a información, a persoa que responde ao teléfono de contacto que aparece nos pasquíns é un home que se identifica como o seu “empregado de fogar”, e atribúese as sesións de cartas do tarot.

O departamento de Acción Disciplinaria do Consello Xeral do Poder Xudicial (CGPJ), informado polo TSXG, abriu este xoves dilixencias informativas para determinar se a xuíza exercía esta actividade.

A apertura destas dilixencias informativas constitúe un paso previo que deberá determinar se se arquiva o caso ou se incoa un expediente disciplinario. Na tramitación deste proceso practicaranse actuacións para “determinar a veracidade dos feitos”, o cal inclúe, segundo explicaron as fontes xudiciais, solicitar a postura da xuíza afectada.

AVOGADOS E FISCALÍA

Os avogados de Santiago xa remitiron queixas contra a xuíza en 2012 por asistir ás vistas cun gato, mentres que o Colexio de Avogados de Lugo atópase á espera da evolución das dilixencias informativas, pero non recibiran ningunha queixa formalmente.

Por outra banda, a súa actividade á fronte do xulgado de Vixilancia Penal causara malestar entre algúns avogados. E segundo confirmaron fontes do Ministerio Público, “o traballo da área de vixilancia penal da Fiscalía de Lugo incrementouse de forma notable desde finais de 2016”, data na que María Jesús García Pérez asumiu o novo destino.