A Xunta de Galicia activou para este xoves a alerta laranxa por choivas na montaña de Lugo e Ourense, así como no sur da provincia lucense. Segundo confirman nun comunicado, a Dirección Xeral de Emerxencias e Interior informou da situación a través do 112 aos concellos das provincias afectadas; deputacións, servizos provinciais e agrupacións de voluntaros de Protección Civil e a clubs náuticos, entre outros.
En base á información da Axencia Estatal de Meteoroloxía (Aemet), a alerta actívase este xoves por precipitacións acumuladas nunha hora de 30 milímetros. Debido á alerta, a Comisión Escolar decidiu suspender as actividades escolares no exterior xa para este mércores entre as 13.00 e as 00.00 horas, en tres zonas. Así, están os da Montaña de Lugo, con 14 concellos afectados (Baleira, Baralla, Becerreá, Cervantes, Folgoso do Courel, A Fonsagrada, O Incio, Navia de Suarna, Negueira de Muñiz, As Nogais, Pedrafita do Cebreiro, Ribeira de Piquín, Samos e Triacastela).
Tamén está afectado o sur de Lugo, con 11 municipios (Bóveda, Carballedo, Chantada, Monforte de Lemos, Pantón, A Pobra do Brollón, Quiroga, Ribas de Sil, O Saviñao, Sober e Taboada) e Montaña de Ourense, con 19 localidades afectadas (O Bolo, Carballeda de Valdeorras, O Castro de Caldelas, Chandrexa de Queixa, Esgos, A Gudiña, Maceda, Manzaneda, A Mezquita, Montederramo, Parada de Sil, A Pobra de Trives, Riós, San Xoán de Río, A Teixeira, A Veiga, Viana do Bolo, Vilariño de Conso e Xunqueira de Espadanedo).
Ademais, a Secretaría Xeral para ou Deporte da Consellería de Presidencia, Xustiza e Deportes tamén acordou a suspensión este xoves da actividade deportiva federada e do programa Xogade no interior, excepto os deportes náuticos e acuáticos federados, nas zonas afectadas pola alerta.
