O sindicato CIG denunciou este martes que a residencia de maiores de Castro Ribeiras de Lea, no concello de Castro de Rei, leva sen persoal médico desde o pasado mes de novembro, unha situación que considera de “extrema gravidade” para a atención das persoas residentes. Segundo recolle a central sindical nun comunicado, a empresa que xestiona o centro entende que coa cobertura do 061 “xa está garantida de maneira suficiente a atención médica”, unha postura que a CIG cualifica de totalmente insuficiente para un centro con preto de 170 persoas maiores, moitas delas con autonomía moi limitada.
Para o sindicato, a ausencia dun médico ou médica provoca atrasos na prescrición de medicamentos, na adaptación de tratamentos e na adopción de pautas de suxeición, xa que estas funcións non poden ser asumidas legalmente polo persoal de enfermaría, auxiliar ou xerocultor. “Isto obriga a derivar ás persoas residentes ao centro de saúde da localidade, que xa está sobrecargado, e fai que os diagnósticos e tratamentos cheguen tarde”, advirte a organización sindical. A CIG alerta de que esta situación prexudica directamente a saúde das persoas maiores e contribúe ao agravamento das súas doenzas, ao non contar cun seguimento médico continuado no propio centro residencial.
INSPECCIÓN SEN CONSECUENCIAS PRÁCTICAS
A problemática levou a que un familiar dun residente presentase unha denuncia ante a Inspección de Política Social, que realizou unha visita á residencia. Porén, segundo lamentan as delegadas sindicais, a intervención da inspección non serviu para obrigar á empresa a contratar un novo médico, senón unicamente para incrementar a carga burocrática do persoal de enfermaría e xerocultores. Desde a CIG esixen unha actuación inmediata da Administración para garantir a presenza dun profesional médico no centro, ao considerar que a situación actual non asegura unha atención digna nin segura ás persoas maiores residentes.
