Dende a inauguración do Hospital Universitario Lucus Augusti (HULA), a Xunta de Galicia esgrimiu razóns técnicas para negar un servizo de hemodinámica as vinte e catro horas. Porén, despois de sete anos de reivindicacións, o centro hospitalario de referencia na provincia contará con horario continuado para atender as complicacións cardíacas. O xefe de Cardioloxía, Juan Carlos González Juanatey, describe a trascendencia desta medida tan demandada.
En primeiro lugar, a consolidación definitiva do horario de hemodinámica –ampliado progresivamente dende as 14.00 horas– “completa a atención” na área sanitaria. Cómpre ter en conta que ata “un vinte e cinco por cento” dos infartos agudos de miocardio atendidos na provincia prodúcense durante a noite. O responsable de Cardioloxía sempre defendeu un servizo sen interrupción en base a este feito.
Mellora nos tempos de diagnóstico e intervención
Así, Juanatey calcula que dos 170 infartos nos que se sitúa a provincia no curso do ano, máis de 40 quedaban fóra do horario de hemodinámica. Co cambio de postura do Sergas, a partir do 18 de febreiro estes casos poderán tratarse directamente polos expertos de Cardioloxía do HULA.
“Estabamos a esperar que se convertese en realidade”, comenta Juanatey, en referencia ao anuncio do conselleiro de Sanidade, Jesús Vázquez Almuiña. “O servizo ampliado vainos permitir atender a eses pacientes e facer unha anxioplastia primaria, recortando os tempos dende o diagnóstico ata a apertura da arteria, que serán de menos de noventa minutos”.
O cardiólogo compostelán, con orixes na Barbanza e Noia, confía en que o actual equipo de Cardioloxía sexa abondo. “Temos unha estrutura asistencial para atender a todos os pacientes”, explica. A estrutura do HULA comprende tres hemodinamistas e un grupo de enfermaría, que para cada caso mobilizan un especialista e dous auxiliares. “Con tres hemodinamistas estamos a cubrir as gardas, esperamos dar resposta para cubrir as 24 horas ao día e os 365 días do ano”.
Jesús Vázquez: “A xente anónima é protagonista no éxito da hemodinámica”
